SİYASƏT
Fransa parlamentinin qərarı söz və fikir azadlığının məhdudlaşdırılması üçün təhlükəli presedent yaradacaqdır
Bakı, 27 dekabr (AZƏRTAC). Dekabrın 27-də Beynəlxalq Mətbuat Mərkəzində Fransa parlamentinin aşağı palatası - Milli Assambleyanın qəbul etdiyi sənədlə bağlı tədbir keçirilmişdir.
AZƏRTAC xəbər verir ki, tədbiri açan Azərbaycan Qadın Jurnalistlər Assosiasiyanın rəhbəri Sevil Yusifova Fransa Milli Assambleyası tərəfindən “erməni soyqırımı” iddialarını inkara görə cinayət məsuliyyətini və 45 min avro cəriməni nəzərdə tutan qanunun qəbul edilməsinin bütün dünyada söz və fikir azadlığının məhdudlaşdırılması üçün təhlükəli presedent yaratdığını bildirmişdir.
Diqqətə çatdırılmışdır ki, tarixi erməni yalanlarına söykənən iddialar səbəbindən insanların söz və fikir azadlıqlarının məhdudlaşdırılması, bu və ya digər tarixi hadisəyə, dönəmə fərqli münasibətə görə azadlıqdan məhrumetmə kimi cəza mexanizmlərinin tətbiqi sivil dünyanın dəyərlərinə meydan oxumaq, bəşəriyyəti geriyə - inkvizisiya dövrünə doğru sürükləmək deməkdir.
Vurğulanmışdır ki, Fransa Milli Assambleyasının qəbul etdiyi qanun bu ölkənin qoşulduğu bütün beynəlxalq hüquqi-normativ sənədlərlə, o cümlədən “İnsan haqları və əsas azadlıqlar haqqında” Konvensiyanın 9, 10, 17, 20 və 23-cü maddələri, Helsinki Yekun Aktı, vətəndaş haqları və siyasi hüquqlarla bağlı Beynəlxalq Pakt və digər sənədlərlə ziddiyyət təşkil edir.
Milli Məclisin deputatı Qənirə Paşayeva tədbirin əhəmiyyətini vurğulamış, bu qərarın Avropa dəyərlərinə böyük zərbə vuracağına əminliyini ifadə etmişdir. Onun sözlərinə görə, Fransa parlamenti və siyasətçiləri söz azadlığına və demokratiyaya zidd olan bu məsələyə ciddi yanaşmalıdırlar. Q.Paşayeva, həmçinin bildirmişdir ki, Fransa parlamentinin insan haqlarının məhdudlaşdırılması istiqamətində atdığı bu yanlış addıma dünya KİV-lərinin nümayəndələri kəskin reaksiya verməlidirlər.
Tədbirdə çıxış edən Milli Məclisin deputatları, KİV nümayəndələri və QHT təmsilçiləri Fransa Milli Assambleyasının beynəlxalq hüququn ali prinsiplərini kobud şəkildə pozan, insan hüquq və azadlıqlarını cəza mexanizmlərinin tətbiqi yolu ilə məhdudlaşdıran qərarını qətiyyətlə pisləmiş, beynəlxalq media qurumlarını bütün dünyada təhlükəli presedent yarada biləcək bu prosesin qarşısının alınması üçün müvafiq tədbirlər görməyə səsləmişlər.
Sonda nüfuzlu beynəlxalq qurumlara müraciət qəbul olunmuş, mövzu ilə bağlı müzakirələr aparılmışdır.