Fransada hökumətin süqutu ölkənin müdafiəsi ilə bağlı planlara ciddi təsir edib
Paris, 9 sentyabr, AZƏRTAC
Sentyabrın 8-də Fransada Fransua Bayru hökumətinin süqutu ölkənin müdafiə planlaşdırılmasına ciddi təsir göstərib. Belə ki, 2026-cı ilin büdcə layihəsi dayandırılıb. Həmçinin 2024-2030-cu illəri əhatə edən Hərbi Proqramlaşdırma Qanununun yenilənməsi üzrə işlərin gecikməsi riski yaranıb. Bu qeyri-sabit siyasi vəziyyət silahlı qüvvələrdə, müdafiə sənayesi sektorunda və bəzi deputatlar arasında ciddi narahatlığa səbəb olub.
AZƏRTAC xəbər verir ki, Fransa Prezidenti Emmanuel Makron bu il iyulun 13-də ordunun büdcəsini sürətlə artırmaq niyyətini bəyan etmişdi. O, müdafiə büdcəsini 2027-ci ilə qədər 64 milyard avroya çatdırmaq istədiyini bildirmişdi. Bu isə Hərbi Proqramlaşdırma Qanununda nəzərdə tutulan müddətin iki il tezləşdirilməsi deməkdir.
Fransa Beynəlxalq Radiosunun məlumatına görə, Milli Assambleyanın Silahlı Qüvvələr Komissiyasının sədri, deputat Jan-Mişel Jak qeyd edib ki, 2026-cı ildə gücləndirilməsi vacib olan hərbi imkanlar artıq müəyyənləşdirilib. O, xüsusilə vacib olan döyüş sursatı və yer-hava tipli raket sistemlərinin zəruriliyini vurğulayıb. Həmçinin dəniz qüvvələrində freqatların sayının artırılmasının da gündəmdə olduğunu bildirərək, bunların uzunmüddətli proqramlar olduğunu, quru, dəniz və hava müdafiəsini əhatə etdiyini bildirib. Deputat diqqətə çatdırıb ki, döyüş meydanında dronların rolu getdikcə artır və buna görə də 2026-cı ildən onların istehsalı başlamalıdır. Hərbi Proqramlaşdırma Qanunu çərçivəsində həyata keçirilməsi nəzərdə tutulan ən vacib və strateji layihələrdən biri də yeni aviadaşıyıcının inşasıdır.
Bildirilir ki, hazırkı hökumətin süqutu və yeni baş nazirin hələ təyin olunmaması Hərbi Proqramlaşdırma Qanunu çərçivəsində planlaşdırılmış bir çox strateji təşəbbüsün reallaşmasını sual altına alır. Müdafiə sənayesində çalışan şirkətlər, ordu rəhbərliyi və bəzi parlament üzvləri bu ləngimələrin Fransa ordusunun hazırlıq səviyyəsinə və texnoloji üstünlüyünə ciddi zərbə vuracağından ehtiyat edirlər. Nəticə etibarilə isə Bayru hökumətinin süqutu yalnız daxili siyasətdə deyil, eyni zamanda, Fransa ordusunun gələcək gücü və müdafiə qabiliyyətinin formalaşmasında da əhəmiyyətli problemlər yaradıb. Yeni hökumətin tezliklə qurulması və strateji layihələrin davam etdirilməsi ölkənin milli təhlükəsizliyi baxımından həyati önəm daşıyır.
Bölmənin digər xəbərləri
