GƏLƏCƏK ƏMƏKDAŞLIĞIN YOLLARI MÜZAKİRƏ OLUNUR
İyunun 18-19-da Samara vilayətində MDB dövlətləri vergi (maliyyə) araşdırmaları orqanları rəhbərləri Əlaqələndirmə Şurasının onuncu iclası keçirilir.
MDB İcraiyyə Komitəsinin mətbuat xidmətindən AZƏRTAC-a bildirmişlər ki, görüş iştirakçıları vergi (maliyyə) araşdırmaları orqanlarının qarşılıqlı əlaqələrinin vəziyyətini və perspektivlərini, cinayət yolu ilə əldə edilən gəlirlərin leqallaşdırılmasına qarşı mübarizədə gələcək əməkdaşlığı və birgə operativ-profilaktiki tədbirlərin keçirilməsini müzakirə edəcəklər. İclasda vergi araşdırmaları orqanları arasında elektron informasiyanın ötürülməsi zamanı kriptoqrafik müdafiə vasitələrinin tətbiqinin öyrənilməsi, habelə bir sıra digər məsələlərin müzakirəsi də nəzərdə tutulmuşdur.
Əlaqələndirmə Şurası vergi qanunvericiliyndə pozuntulara qarşı mübarizə sahəsində qarşılıqlı fəaliyyət məqsədi ilə 2000-ci ildə yaradılmışdır. Şuranın əsas vəzifəsi informasiya mübadiləsi, habelə bu cür qanun pozuntularının aşkara çıxarılmasına, qabaqlanmasına və qarşısının alınmasına dair tövsiyə və təklifləri hazırlamaqdır. Bundan əlavə, şura Birlik dövlətlərinin milli qanunvericiliklərinin təkmilləşdirilməsinə və uyğunlaşdırılmasına, vergi qanunvericiliyində pozuntulara qarşı mübarizə sahəsində müqavilə-hüquq bazasının inkişafına dəstək verir.
Bölmənin digər xəbərləri
