Gəncədə “Musiqidə milli ənənələrin təcəssümü” adlı elmi-praktik seminar keçirilib
Bakı, 9 aprel, AZƏRTAC
Mədəniyyət Nazirliyinin Mədəniyyət üzrə Elmi-Metodiki və İxtisasartırma Mərkəzi (MEMİM) tərəfindən Gəncədə “Mədəniyyət rüzgarı” tədbirlər silsiləsi çərçivəsində Gəncə Dövlət Universiteti (GDU) ilə birgə “Musiqidə milli ənənələrin təcəssümü” adlı elmi-praktik seminar təşkil edilib.
Mərkəzdən AZƏRTAC-a bildirilib ki, Gəncə Dövlət Universitetinin rektorunun baş müşaviri, tarix üzrə fəlsəfə doktoru, dosent Asif Cavadov və MEMİM-in direktoru vəzifəsini icra edən sənətşünaslıq üzrə fəlsəfə doktoru Vüqar Hümbətov dahi bəstəkarımız Üzeyir Hacıbəylinin anadan olmasının 140 illiyi çərçivəsində keçirilən seminarın məqsədinin milli köklərimiz zəminində formalaşan bəstəkarlıq ənənələri, Azərbaycan peşəkar musiqi irsinin tədqiqat məsələlərini gənc nəslə çatdırmasını vurğulayıblar.
GDU-nun “Musiqi fənləri” kafedrasının müdiri, Əməkdar müəllim, sənətşünaslıq üzrə elmlər doktoru, professor Sevda Qurbanəliyeva, kafedranın baş müəllimləri, sənətşünaslıq üzrə fəlsəfə doktorları Sevinc Rüstəmova və Nüşabə Seyfullayeva, Üzeyir Hacıbəyli adına Bakı Musiqi Akademiyasının baş müəllimi, Əməkdar artist, sənətşünaslıq üzrə fəlsəfə doktoru İlham Nəzərov, sənətşünaslıq üzrə fəlsəfə doktoru, dosent Aytən Babayeva, MEMİM-in aparıcı metodisti, sənətşünaslıq üzrə fəlsəfə doktoru Leyla Muradzadə çıxışlarında mövzularla bağlı araşdırmalarını təqdim edərək, videomateriallar və musiqi nömrələri təqdim ediblər.
Əməkdar mədəniyyət işçisi, sənətşünaslıq üzrə fəlsəfə doktoru, Səadət Təhmirazqızının moderatorluğu ilə keçirilən elmi-praktik seminarda GDU-nun müəllim və tələbələrinin ifasında musiqi əsərləri səslənib, məruzələr ətrafında fikir mübadiləsi aparılıb.
Bölmənin digər xəbərləri
