SİYASƏT
Gəncədə Yeni Azərbaycan Partiyasının yaradılmasının 21-ci ildönümü qeyd edilmişdir
Gəncə, 25 noyabr (AZƏRTAC). Gəncədə Yeni Azərbaycan Partiyasının (YAP) 21-ci ildönümü qeyd edilmişdir.
AZƏRTAC xəbər verir ki, tədbirdən əvvəl iştirakçılar partiyanın yaradıcısı, ulu öndər Heydər Əliyevin şəhər mərkəzindəki abidəsini ziyarət edərək önünə gül dəstələri qoymuşlar.
Sonra yubiley tədbiri şəhər icra hakimiyyətinin böyük salonunda davam etdirilmişdir. Tədbirdə Gəncə Şəhər İcra Hakimiyyətinin başçısı Elmar Vəliyev çıxış edərək 1992-ci il noyabrın 21-də ümummilli lider Heydər Əliyev tərəfindən yaradılan Yeni Azərbaycan Partiyasının məqsəd və məramından danışaraq demişdir ki, bu siyasi qurumun əsas ideyası müstəqil dövlətçilik, qanunçuluq, azərbaycançılıq, yaradıcı təkamül, vətəndaş həmrəyliyi və sosial ədalət prinsipləri olmuşdur. Bu gün bütün bunlar həyatımızın bütün sahələrində öz əksini tapmışdır. Üzvlərinin sayı 600 mindən çox olan Yeni Azərbaycan Partiyası həqiqətən ümumxalq partiyasına çevrilmişdir. YAP bir iqtidar partiyası kimi qarşıya qoyduğu bütün islahatları uğurla həyata keçirmiş, 21 il ərzində demokratik seçki prinsiplərinə yiyələnmiş, Azərbaycanda sosial-iqtisadi inkişaf meyllərinin sürətləndirilməsini, eləcə də xalqın maraqlarına cavab verən xarici siyasət yürütməsini təmin etmişdir.
Toplantıda qeyd edilmişdir ki, Yeni Azərbaycan Partiyasının fəaliyyətə başladığı ilk gündən gəncəlilər də ona ürəkdən inanmış və özlərini bu siyasi qurumun tərkibində görmək arzusunda olmuşlar. Məhz bunun nəticəsidir ki, bu gün Gəncədə partiyanın 30 min nəfərə yaxın üzvü vardır. Onlardan 441 nəfəri elmlər namizədi, 51 nəfəri elmlər doktoru, 11048 nəfəri ali təhsilli, 18952 nəfəri isə orta təhsillidir.
YAP Gəncə şəhər təşkilatının sıralarında daha çox gənclərin olduğunu diqqətə çatdıran natiq onu da əlavə etmişdir ki, bu günlərdə yayılan xoş xəbər partiyanın qazandığı növbəti uğurlardandır. Gəncə “Avropa gənclər paytaxtı” müsabiqəsində qalib gələrək 2016-cı ilin Avropa gənclər paytaxtı elan edilmişdir.
Tədbirdə Azərbaycan Milli Elmlər Akademiyası Gəncə Bölməsinin direktoru, akademik Fuad Əliyev, Yeni Azərbaycan Partiyasının qocaman üzvlərindən Cəmil Hacıyev, Azərbaycan Bitki Mühafizə Elmi-Tədqiqat İnstitutunun direktoru, akademik Siddiqə Məmmədova, şəhər gənclər və idman baş idarəsinin rəisi Müşfiq Cəfərov, YAP Gəncə şəhər təşkilatının sədri Naqif Həmzəyev və başqaları çıxış edərək ölkəmizin iqtisadi və siyasi həyatında aparıcı yeri olan Yeni Azərbaycan Partiyasının gördüyü işlərdən və qazandığı uğurlardan danışmışlar.
Toplantıda YAP Gəncə şəhər təşkilatı veteranlarının bir qrupuna fəxri fərmanlar və qiymətli hədiyyələr verilmiş, təşkilatın 30 mininci üzvünə və eləcə də partiya sıralarına yeni qəbul olunmuş gənclərə üzvlük vəsiqələri təqdim olunmuşdur.