GƏNCLƏR VƏ İDMAN NAZİRİ AZAD RƏHİMOV BEYNƏLXALQ VELOYÜRÜŞÜN İŞTİRAKÇILARI İLƏ GÖRÜŞMÜŞDÜR
AZƏRTAC xəbər verir ki, aprelin 15-də gənclər və idman naziri Azad Rəhimov Pekin Yay Olimpiya Oyunlarına həsr olunmuş beynəlxalq veloyürüşün iştirakçıları ilə görüşmüşdür.
İdmançıları ölkəmizdə görməyindən məmnun olduğunu bildirən A.Rəhimov Pekinə qədər keçəcəkləri yolda idmançılara uğurlar arzulamış, bu şərəfli işdə idmançıları dəstəklədiyini bildirmişdir.
Azərbaycanda böyük səmimiyyət və qonaqpərvərliklə qarşılandıqlarını bildirən veloyürüşçülər ölkəmizdən unudulmaz hisslərlə ayrılacağını demişlər. Azərbaycana qədər bir neçə ölkədən keçdiklərini bildirən marafon iştirakçıları ölkəmizdə olan qonaqpərvərliklə heç yerdə rastlaşmadıqlarını bildirmişlər.
Qeyd edək ki, “Olimpiya məşəli hər zaman qəlbimizdədir” devizi altında fevralın 20-də Afinada start götürmüş və Pekinə hərəkət edən beynəlxalq veloyürüşdə Yunanıstan, Litva, İtaliya, Almaniya, Yeni Zelandiya, Hollandiya və Finlandiyadan 20-dən çox velosipedçi iştirak edir.
Qədim İpək yolu marşrutu üzrə hərəkət edən veloyürüşçülərin yalnız 12-si Olimpiya Oyunlarının başlanacağı gün - avqustun 8-də Pekinə çatmaq niyyətindədirlər.
Bölmənin digər xəbərləri
