“Gömrük tarifi haqqında” yeni qanun layihəsi Milli Məclisdə müzakirəyə çıxarılmışdır
Bakı, 18 aprel (AZƏRTAC). AZƏRTAC xəbər verir ki, “Gömrük tarifi haqqında” yeni qanun layihəsi aprelin 18-də Milli Məclisin iqtisadi siyasət komitəsində müzakirə olunmuşdur.
Milli Məclisin iqtisadi siyasət komitəsinin sədri Ziyad Səmədzadə demişdir ki, Azərbaycan Prezidentinin imzası ilə parlamentə daxil olmuş bu qanunun ölkəmizin iqtisadi və milli təhlükəsizliyi baxımından böyük əhəmiyyəti vardır.
Bu qanun gömrük tarifinin formalaşdırılması, tətbiqi, həmçinin gömrük sərhədindən keçirilən mallardan gömrük rüsumlarının tutulması qaydalarını müəyyən edəcəkdir.
Layihə barədə məlumat verən Dövlət Gömrük Komitəsinin Baş idarə rəisi, general-mayor Mirqasım Vahabov bildirmişdir ki, sənəd 5 fəsil, 23 maddədən ibarətdir. Qanunun əsas məqsədi idxalın əmtəə strukturunu tənzimləmək, valyuta gəlirlərinin və xərclərinin əlverişli nisbətini təmin etmək, ölkə iqtisadiyyatını xarici rəqabətin mənfi təsirindən qorumaq və dünya iqtisadiyyatına inteqrasiyasına şərait yaratmaqdır.
Sənəddə ixracat və idxalatın operativ tənzimlənməsi məqsədi ilə müəyyən hallarda mövsümi rüsumların tətbiqi məsələsi də əksini tapmışdır. Lakin mövsümi rüsumların tətbiqi 6 aydan çox ola bilməz.
Qanun layihəsində malın gömrük dəyərinin bəyan edilməsi, məlumatın məxfiliyinin qorunması, bəyannaməsinin hüquq və vəzifələri, gömrük orqanının hüquq və vəzifələri, malların sövdələşmə qiymətinin müəyyən edilməsi üsulları, gömrük rüsumlarından azad etmə və tarif güzəştləri də öz əksini tapmışdır.
Sənəddə, həmçinin qeyd olunmuşdur ki, istehsal ehtiyaclarını yerli xammal hesabına ödəmək mümkün olmadıqda müvafiq icra hakimiyyəti orqanı konkret sahənin inkişafını təmin etmək məqsədi ilə istehsal təyinatlı xammalın və müasir texnologiyanı təmin edən avadanlığın idxalına konkret dövr üçün nəzərdə tutulan tarif güzəştləri tətbiq edə bilər.
Bundan başqa, layihədə deyilir ki, gömrükdən keçirilən zaman hər hansı mala gömrük əməkdaşı tərəfindən düzgün olmayan dəyər təklif edilərsə və məhkəmə bəyannaməsinin mövqeyinin düzgün olduğunu təsdiqləyərsə, bəyannaməyə dəyən zərər və malın dəyərinə edilən düzəlişlər bunu təklif edən vəzifəli gömrük əməkdaşı tərəfindən ödəniləcək, eyni zamanda həmin əməkdaş intizam məsuliyyətinə cəlb olunacaqdır.
Bu qanuna əsasən müəyyən yükləri daşıyan və eyni zamanda dənizdə balıq ovlayan Azərbaycan gəmilərinin, o cümlədən Azərbaycanın hüquqi və fiziki şəxsləri tərəfindən icarəyə götürülmüş gəmilərin fəaliyyətini təmin etmək məqsədi ilə gömrük ərazisindən çıxarılan maddi-texniki təchizat, tədarük malları, yanacaq, ərzaq, dərman və digər məhsullar gömrük rüsumundan qanunla azad ediləcəkdir.
Miqrantların sərhəddən keçərkən şəxsi əşyaları, məişət avadanlığı, əmək fəaliyyəti üçün zəruri olan alətləri də gömrük rüsumundan azad ediləcəkdir.
Müzakirələr zamanı komitə sədrinin müavini Çingiz Əsədullayev, deputatlar Vahid Əhmədov, Rüfət Quliyev, Əli Məsimli və başqaları çıxış edərək qanun layihəsinin əhəmiyyətindən danışmışlar. Bildirilmişdir ki, hazırda Azərbaycanın Ümumdünya Ticarət Təşkilatına (ÜTT) daxil olması istiqamətində intensiv danışıqlar gedir, bir sıra problemlərin həlli də təşkilata qəbul olunduqdan sonra öz həllini tapa bilər. Eyni zamanda daxili bazarı qorumaq, ixracatı artırmaq üçün rəqabət qabiliyyətli məhsullar istehsal olunmalıdır.
Sonra iclasda “Daşınmaz əmlakın dövlət reyestri haqqında” Qanuna dəyişikliklər edilməsi barədə” məsələyə baxılmışdır.
Qeyd olunmuşdur ki, bu dəyişiklik redaktə xarakterlidir.
Sonda hər iki qanun layihəsi təsdiqlənmək üçün Milli Məclisin müzakirəsinə tövsiyə olunmuşdur.
Bölmənin digər xəbərləri
