Gömrükçülər narkotik vasitə aşkarlayıb
Bakı, 25 yanvar, AZƏRTAC
Gömrükçülər narkotik vasitə aşkarlayıb.
Dövlət Gömrük Komitəsinin mətbuat və ictimaiyyətlə əlaqələr idarəsindən AZƏRTAC-a bildirilib ki, Cənub Ərazi Baş Gömrük İdarəsi Əməliyyat və Təhqiqat İdarəsinin Əməliyyat şöbəsinə daxil olan məlumat əsasında piyada yolla İran İslam Respublikasından gələn bu ölkə vətəndaşı Astara gömrük postunda saxlanılıb və onun üzərində şəxsi yoxlama aparılıb. Şəxsi yoxlama zamanı onun üzərində qanunla qadağan olunan hər hansı predmet aşkarlanmasa da, daxili orqanlarının tibbi müayinədən keçirilməsi zərurəti yaranıb. Astara Rayon Mərkəzi Xəstəxanasına aparılan vətəndaşın tibbi müayinəsi nəticəsində - düz bağırsağından, şəffaf sellofana bükülü 3 ədəd yumru uzunsov formalı bağlama və bir ədəd büküm aşkarlanıb. Baxış zamanı 3 ədəd bağlamada qablaşdırılması ilə birlikdə çəkisi 165 qram təşkil edən ağ rəngli, kristal formada psixotrop maddə-metamfetamin və bir ədəd bükümdə isə ümumi çəkisi 0,35 qram təşkil edən tünd qəhvəyi rəngli narkotik vasitə - heroin, həmçinin həmin bükümün içərisində qəhvəyi rəngli, yumru formalı, üzərində “M40” yazısı olan 2 ədəd metadon və 2 ədəd “Clonazepam” həbləri aşkarlanıb.
Xatırladaq ki, metamfetamin adlı preparat “Azərbaycan Respublikasının ərazisində dövriyyəsi qadağan edilmiş psixotrop maddələrin I Siyahısı”na daxildir. Metadon Azərbaycan ərazisində dövriyyəsi məhdudlaşdırılan narkotik vasitə, “Clonazepam” adlı dərman preparatı isə ölkə ərazisində dövriyyəsinə nəzarət edilən psixotrop maddədir.
Faktla bağlı araşdırma aparılır.
Bölmənin digər xəbərləri
