Göyçayda avtoqəzada sürücü ölüb, ana və qızı ağır xəsarət alıb
Göyçay, 12 may, Şahnəzər Bəşirov, AZƏRTAC
Göyçayda bir nəfərin ölümü, iki nəfərin ağır xəsarət alması ilə nəticələnən yol-nəqliyyat hadisəsi baş verib.
AZƏRTAC-ın bölgə müxbiri xəbər verir ki, hadisə bu gün saat 13:00 radələrində Bakı-Şamaxı-Yevlax avtomobil yolunun Göyçayın Qarabaqqal kəndi ərazisindən keçən hissəsində qeydə alınıb. “VAZ 2106” markalı minik avtomobilinin “SHACMAN” markalı yük avtomobili ilə toqquşması nəticəsində İsmayıllı rayon sakini Novruzov Bayram Fərhad oğlu aldığı ağır xəsarətlər səbəbindən hadisə yerində dünyasını dəyişib.
Həmçinin minik avtomobilinin sərnişinləri olan İsmayıllı sakinləri, 2001-ci il təvəllüdlü Şəfiyeva Kamilə Rövşən qızı və anası 1968-ci il təvəllüdlü Reyhan Şəfiyeva müxtəlif dərəcəli bədən xəsarətləri aldıqları üçün təcili tibbi yardım stansiyasının avtomobili ilə Göyçay Rayon Mərkəzi Xəstəxanasına çatdırılıb.
Faktla bağlı Baş Dövlət Yol Polisi İdarəsinin istintaq və təhqiqat şöbəsi tərəfindən araşdırma aparılır.
Bölmənin digər xəbərləri
