GÜRCÜSTANIN MƏRKƏZİ SEÇKİ KOMİSSİYASI PARLAMENTƏ SEÇKİLƏRİN İLKİN RƏSMİ NƏTİCƏLƏRİNİ ELAN ETMİŞDİR
AZƏRTAC-ın xüsusi müxbiri xəbər verir ki, mayın 23-də Gürcüstanın Mərkəzi Seçki Komissiyası (MSK) 6-cı çağırış parlamentə mayın 21-də keçirilmiş seçkilərin ilkin rəsmi nəticələrini elan etmişdir.
MSK-nın mətbuat xidmətinin rəhbəri Zurab Kackaçişvili seçkilərin keçirilməsi prosesi ilə məşğul olan 50 min nəfərə və mülki reyestr agentliyinin əməkdaşlarına səmərəli xidmətlərinə görə təşəkkür etmiş, beynəlxalq və yerli təşkilatlardan olan müşahidəçilərin fəallığı sayəsində seçki prosesində irəliləyişlərə nail olunduğunu vurğulamışdır. Z.Kackaçişvili bildirmişdir ki, ilkin rəsmi məlumata görə, hakim partiya seçicilərin səsinin 59,48 faizini qazanaraq birinci yerdədir. İkinci yerdə olan birləşmiş müxalifətin blokuna seçicilərin 17,69, üçüncü yerdə olan Xristian-Demokrat Hərəkatına 8,26, dördüncü yerdə olan Leyboristlər Partiyasına 7,55 faiz səs vermişlər.
Z.Kackaçişvili demişdir ki, majoritar sistem üzrə seçkilərdə də hakim partiya qalibdir. Onların namizədlərinin 71 nəfəri majoritar sistem üzrə deputat seçilmişdir. Bu sistem üzrə qalan 4 yeri isə müvafiq olaraq birləşmiş müxalifət (2 deputat), Respublikaçılar Partiyası (2 deputat) bölüşmüşlər.
Beləliklə, 6-cı çağırış Gürcüstan parlamentində 5 faizlik seçki maneəsini dəf edən 4 partiya təmsil olunacaqdır ki, onlardan da 3-ü müxalifətdir. MSK qanun pozuntularına yol verildiyinə görə 15 seçki məntəqəsində seçkilərin nəticələrini ləğv etmişdir.
Gürcüstan Prezidenti Mixail Saakaşvili bütün siyasi qüvvələri gürcü xalqının iradəsinə hörmət etməyə çağırmışdır. Prezident parlament fraksiyalarının hamısı ilə səmərəli əməkdaşlığa hazır olduğunu demişdir.
