Gürsel Baran: Rəsmi Bakı ilə Ankaranın bir çox sahələrdə əməkdaşlıq imkanları mövcuddur
Bakı, 23 aprel, Elvin Camalov, AZƏRTAC
Rəsmi Bakı ilə Ankaranın bir çox sahələrdə əməkdaşlıq imkanları mövcuddur.
Bu sözləri AZƏRTAC-a müsahibəsində Ankara Ticarət Palatasının sədri Gürsel Baran deyib.
O bildirib ki, paytaxt Ankara Türkiyənin əsas nəqliyyat mərkəzlərindən biridir. Buna görə də, Ankaradan xarici ölkələrə və əks istiqamətdə aviareyslərin sayını artırmaq qarşıdakı mühüm vəzifələrdəndir. Artıq Türk Hava Yollarının Ankara-Bakı-Ankara reysi fəaliyyətə başlayıb. Bu reyslər turizm və iqtisadi cəhətdən də iki ölkə üçün yeni imkanlar yaradacaq.
G.Baran qeyd edib ki, Ankara müdafiə sənayesinə görə dünyada əsas yerlərdən birini tutur. Bundan başqa, səhiyyə turizminə, böyük sərgi və konfransların keçirilməsinə görə də üstün mövqeyə sahibdir: “Rəsmi Ankara ilə Bakı arasında ən çox təhsil sahəsinə diqqət yetirilməlidir. Azərbaycan müstəqillik elan etdikdən bu günə qədər 125 min azərbaycanlı tələbə Türkiyədə təhsil alıb. Hazırda isə 15 min tələbə təhsilini davam etdirir. Bu sayı daha da artırmaq mümkündür. Ümumiyyətlə Ankara-Bakı aviareysi açıldığı üçün iki qardaş ölkə arasında iqtisadi sahədə daha çox layihələr həyata keçirmək olar”.
Bölmənin digər xəbərləri
