HEMOFİLİYALI XƏSTƏLƏRƏ YARDIM MƏQSƏDİ İLƏ BİR SIRA AKSİYALAR KEÇİRİLMİŞDİR
Səhiyyə Nazirliyinin mətbuat xidmətindən AZƏRTAC-a bildirmişlər ki, 17 aprel Ümümdünya Hemofiliya günü münasibətilə respublikamızın tibb mərkəzlərində müxtəlif aksiyalar təşkil olunmuşdur.
Statistik məlumatlara görə, dünyada təxminən 400 min nəfər irsi qan xəstəliyi olan hemofiliyadan əziyyət çəkir. Azərbaycanda isə 1100 nəfər belə xəstə qeydiyyata alınmışdır. 1973-cü ildə Mirqasımov adına Respublika Klinik Xəstəxanasının nəzdində yaradılmış Elmi-Praktik Hemofiliya Mərkəzində həmin xəstələr müayinə və müalicə olunurlar. Bu gün Azərbaycanda hemofiliyalı xəstələrin müalicəsi uğurla aparılır.
Əgər əvvəllər bu xəstələr üçün adi diş çəkdirmək, yaxud onlar üzərində aparılan cərrahiyyə əməliyyatı ölümlə nəticələnə bilərdisə, bu gün belə bir problem yoxdur. Çünki hemofiliyalı xəstələr üçün ən vacib müalicəvi preparatlar Səhiyyə Nazirliyi tərəfindən mütəmmadi olaraq xaricdən ölkəmizə gətirilir. Həmin dərmanlar Elmi-Praktik Mərkəzin həkimləri tərəfindən xəstələrə tamamilə pulsuz, dövlət hesabına verilir.
Qeyd edək ki, Ümumdünya Hemofiliya günü dünyanın 102 ölkəsində qeyd olunur.
Bölmənin digər xəbərləri
