İdarə Heyətinin sədri: Azərbaycanın şəhərsalma sahəsindəki iştirakçı yanaşmalarının əhəmiyyəti daha da artıb
Bakı, 17 may, AZƏRTAC
Azərbaycanın qeyri-hökumət təşkilatları (QHT) sektorunu təmsil edən çətir təşkilatı olaraq, Azərbaycan Milli QHT Forumu ölkəmizin Ümumdünya Şəhərsalma Forumunun 13-cü Sessiyasına (WUF13) ev sahibliyi etməsindən və vətəndaş cəmiyyəti təşkilatlarının bu qlobal prosesdə fəal rol oynamasından qürur duyur. Azərbaycan Milli QHT Forumu öz ətrafında ölkəmizdə vətəndaş cəmiyyəti institutlarının ən böyük çətir təşkilatıdır və dayanıqlı inkişaf, iqlim fəaliyyəti, sosial inklüzivlik, şəhərsalma, humanitar təşəbbüslər, gənclərin iştirakçılığı və digər sahələrdə fəaliyyət göstərən yüzlərlə QHT-ni bir araya gətirir.
AZƏRTAC xəbər verir ki, bunu Azərbaycan Milli QHT Forumunun İdarə Heyətinin sədri Ramil İskəndərli WUF13 çərçivəsində keçirilən “İcma birliklərinin və vətəndaş cəmiyyəti təşkilatlarının Assambleyasının” açılış sessiyasında çıxış edərkən deyib.
O qeyd edib ki, Azərbaycanın “İctimai iştirakçılıq haqqında” Qanunu vətəndaşların dövlət siyasətinin formalaşdırılması və qərarqəbuletmə proseslərində iştirak mexanizmlərini müəyyən edir. Eyni zamanda, Azərbaycanın Şəhərsalma və Tikinti Məcəlləsində ictimai iştirakçılıq, şəffaflıq, ictimai dinləmələr, ərazi planlaşdırılması və şəhərsalma fəaliyyəti zamanı ictimai rəyin nəzərə alınması ilə bağlı mühüm müddəalar əks olunub: “Qanunvericiliyə əsasən, şəhərsalma prosesləri zamanı maraqlı tərəflər və icmalar məlumatlandırılmalı və onlarla məsləhətləşmələr aparılmalıdır. İctimai müzakirələr və dinləmələr dövlət, ictimai və özəl maraqların balanslaşdırılması üçün mühüm mexanizmlər hesab olunur. Azərbaycanın son illərdə şəhərsalma sahəsindəki iştirakçı yanaşmalarının əhəmiyyəti daha da artıb. Bakıda, Gəncədə, işğaldan azad edilmiş Ağdam və digər şəhərlərdə Baş planların müzakirəsi zamanı beynəlxalq ekspertlərin iştirakı, yerli icmaların cəlb edilməsi və ictimai rəylərin toplanması istiqamətində addımlar atılıb. Son illərdə forumumuz beynəlxalq əməkdaşlıq proseslərində, xüsusilə iqlim dəyişiklikləri, dayanıqlı urbanizasiya və Qlobal Cənub əməkdaşlığı sahələrində daha fəal iştirak edir. COP29 zamanı Azərbaycan vətəndaş cəmiyyəti təşkilatları dialoqun təşviqi, tərəfdaşlıqların gücləndirilməsi və Qlobal Cənub icmalarının səsinin daha güclü şəkildə çatdırılması istiqamətində fəal rol oynayıb”.
Onun sözlərinə görə, WUF13 Azərbaycanın vətəndaş cəmiyyəti sektoru və yerli və qlobal tərəfdaşlar arasında beynəlxalq əməkdaşlıq üçün növbəti mühüm mərhələdir: “Biz UN-Habitat ilə artan əməkdaşlığı və WUF13 prosesi boyunca nümayiş etdirilən inklüziv yanaşmanı yüksək qiymətləndiririk. Mən qəti şəkildə inanıram ki, bu əməkdaşlıq WUF13-dən sonra da davam etməli və dayanıqlı şəhərsalma, iqlim davamlılığı və iştirakçı idarəetmə sahələrində uzunmüddətli və daha güclü tərəfdaşlıqlara çevrilməlidir. Bugünkü assambleya xüsusilə ona görə əhəmiyyətlidir ki, bizə çox sadə, lakin əsas bir həqiqəti xatırladır: İnsanlar olmadan dayanıqlı şəhərlər qurmaq mümkün deyil və icmalar olmadan qlobal gündəliklər uğur qazana bilməz. Bu assambleyanın özü də həmin prinsipi əks etdirir. WUF13 konsept sənədlərində qeyd olunduğu kimi, vətəndaş cəmiyyəti və yerli icma təşkilatlarının rəhbərliyi ilə iştirakçı yanaşma əsasında qurulmuş, təmsilçilik, müxtəliflik və mənalı inklüzivliyin təmin edilməsinə yönəlib. Bu gün dünya bir-biri ilə əlaqəli çoxsaylı böhranlarla üz-üzədir: iqlim dəyişiklikləri, şəhər bərabərsizliyi, məcburi köçkünlük, mənzil təhlükəsizliyi problemləri və yerli icmalar üzərində artan təzyiqlər. Belə bir dövrdə yerli təşkilatlar ikinci dərəcəli aktorlar deyillər. Onlar cəmiyyət daxilində ilk reaksiya verənlər, körpü quranlar və etimad yaradanlardır. Məhz buna görə Qlobal Cənub QHT Platforması kimi təşəbbüslər getdikcə daha mühüm əhəmiyyət qazanır. GSNP 2024-cü ildə Bakıda keçirilən COP29 zamanı Azərbaycan Milli QHT Forumunun təşəbbüsü ilə yaradılıb. Bu gün artıq Qlobal Cənub müxtəlif regionlarından vətəndaş cəmiyyəti səslərini birləşdirən beynəlxalq səviyyədə tanınmış bir platformadır”.
Bölmənin digər xəbərləri
