“İLİN ƏN YAXŞI MÜƏLLİMİ” MÜSABİQƏSİNİN II MƏRHƏLƏSİNƏ BURAXILAN PEDAQOQLARLA GÖRÜŞ
Təhsil Nazirliyindən AZƏRTAC-a bildirmişlər ki, bu qurumda Azərbaycan Respublikasının Prezidenti İlham Əliyevin müvafiq Sərəncamına əsasən keçirilən “İlin ən yaxşı müəllimi” müsabiqəsinin II mərhələsinə buraxılan 208 nəfər müəllimlə görüş olmuşdur.
Görüşdə təhsil naziri Misir Mərdanov “İlin ən yaxşı müəllimi” və “İlin ən yaxşı ümumtəhsil məktəbi” müsabiqələrinin I mərhələsinin başa çatdığını bildirmişdir.
Qeyd olunmuşdur ki, “İlin ən yaxşı müəllimi” müsabiqəsində iştirak etmək üçün 393 müəllim müraciət etmiş, onlardan 208 nəfəri müvafiq bal toplayaraq müsabiqənin II mərhələsinə buraxılmışdır.
Nazir müsabiqənin II mərhələsinə buraxılan müəllimləri təbrik edərək, onlara yeni mərhələ barədə məlumat vermişdir. O, həmin müəllimlərin sınaq dərsləri keçmələri üçün Bakıda 28 məktəbin seçildiyini, aprelin 23-dən 26-dək keçiriləcək sınaq dərslərinin müəyyənləşdirilmiş 12 meyar üzrə qiymətləndiriləcəyini söyləmişdir.
M. Mərdanov, eyni zamanda diqqətə çatdırmışdır ki, hər fənn müəllimi sınaq dərsini öz ixtisasına uyğun keçəcək, dərslərdə isə rəsmi təsdiqlənmiş komissiya üzvləri iştirak edəcəklər.
Sonra müsabiqənin II və III mərhələləri ilə bağlı müəllimləri maraqlandıran suallara cavab verilmişdir.
Bölmənin digər xəbərləri
