İmişlidə cari ilin üç ayının yekunları müzakirə olunub
İmişli, 19 aprel, Mahir Babayev, AZƏRTAC
Yanvar-mart aylarında İmişlinin sosial-iqtisadi inkişafında uğurlu nəticələr əldə olunub. İqtisаdiyyаtın əsаs sаhələri üzrə 64 207 500 mаnаtlıq məhsul istehsal edilib və xidmətlər göstərilib ki, bu da ötən ilin müvafiq dövrü ilə müqayisədə xeyli çoxdur.
AZƏRTAC-ın bölgə müxbiri xəbər verir ki, bu barədə aprelin 19-da rayondakı Heydər Əliyev Mərkəzində cari ilin üç ayının yekunları və qarşıda duran vəzifələrə həsr olunan hesabat yığıncağında rayon icra hakimiyyətinin başçısı Vilyam Hacıyev məlumat verib.
Qeyd olunub ki, hesabat dövründə rayonda tikinti-abadlıq və quruculuq işləri davam etdirilib. Şəhərdə Qarabağ müharibəsi əlilləri və şəhid ailələrinin mənzil şəraitinin yaxşılaşdırılması məqsədilə 6 mərtəbəli 54 mənzilli yaşayış binası, “ASAN xidmət” Mərkəzi və Bayraq muzeyinin inzibati binalarının tikintisi davam etdirilib. Şəhərin P.Həsənov, Koroğlu, Q.Qarayev, L.Vəliyev küçələrinə asfalt örtüyü, Heydər Əliyev prospektində isə səkilərə yeni səki daşları və tamet piltələr döşənir. Həmçinin yaxın vaxtlarda 14 kilometrlik İmişli-Yalavac-Axıcanlı-Rəsullu-Şahverdili-Bəhrəmtəpə-Qaragüvəndikli yerli əhəmiyyətli avtomobil yolunda təmir işlərinə başlanılacaq.
İlin üç ayı ərzində istehlakçıların fasiləsiz və etibarlı elektrik enerjisi təchizatının yaxşılaşdırılması məqsədi ilə 10 və 0,4 kilovatlıq xətlərdə yenidənqurma işləri aparılıb, istismar müddətini başa vurmuş dayaq və naqillər yenilənib. Bu müddətdə 50 ədəd müxtəlif güclü transformator cari, 45 ədəd transformator yarımstansiyası isə əsaslı təmir edilib. Hazırda Aranlı, Qızılkənd, Hacırüstəmli, Çaxırlı və Məzrəli kəndlərində elektrik təsərrüfatlarında müvafiq təmir işləri aparılır.
Regional Qaz İstismarı İdarəsinin İmişli xidmət sahəsi tərəfindən rayonda ötən müddətdə 98 yeni fərdi ev, 7 qeyri-əhali sektorunu təmsil edən obyekt qazlaşdırılıb. Rayonun 37 yaşayış məntəqəsinin tam qazlaşdırılması təmin edilib.
Kəndlərin su təchizatını yaxşılaşdırmaq, əhalini ekoloji cəhətdən təmiz içməli su ilə təmin etmək məqsədilə rayonun 43 kəndində modul tipli sutəmizləyici qurğular quraşdırılıb, Şahverdili, Göbəktala, Məhəmmədli və Rəsullu kəndlərinə yeni su xətlərinin çəkilməsi yekunlaşıb.
Yığıncaqda qeyd edilib ki, ötən müddətdə rayonda heyvandarlığın və quşçuluğun inkişaf etdirilməsi istiqamətində də təqdirəlayiq işlər görülüb, heyvanların və quşların baş sayı xeyli artıb. Ət, süd və yumurta istehsalı nəzərəçarpacaq qədər çoxalıb. Rüb ərzində rayonda 2785 ton ət (diri çəkidə), 12471 ton süd, 13050 ədəd yumurta istehsal olunub. Mal-qaranın və qoyun-keçilərin sayı ümumilikdə 348 min 640 başa çatıb.
Vurğulanıb ki, ölkədə aparılan aqrar islahatların uğurla həyata keçirilməsi nəticəsində rayonda bu sahənin də sürətli inkişafına nail olunub. Bu il rayonda 15 min 145 hektar sahədə pambıq əkilməsi nəzərdə tutulub. 2017-ci ildə cari ilin məhsulu üçün rayonda 19 min 135 hektar taxıl əkilib, 70 hektarda kartof, 72 hektarda isə tərəvəz əkini aparılıb.
Yığıncaqda təhsil, səhiyyə, mədəniyyət və idman sahələrində görülən işlərdən, həyata keçirilən tədbirlərdən də danışılıb.
Sonda müzakirə olunan məsələ ilə bağlı qərar qəbul edilib.
Bölmənin digər xəbərləri
