İndoneziyada Anak-Karakatau vulkanının fəallaşması nəticəsində həyəcan səviyyəsi yüksəldilib
Tokio, 27 dekabr, AZƏRTAC
İndoneziyanın hakimiyyət orqanları Zond boğazında yerləşən Anak-Karakatau vulkanının fəallaşması nəticəsində həyəcan səviyyəsini yüksəldiblər.
AZƏRTAC xəbər verir ki, bu barədə “Channel News Asia” telekanalı məlumat yayıb. Məlumatda qeyd edilir ki, vulkandan püskürən külün artması nəticəsində həyəcan səviyyəsi üçüncü həddə qaldırılıb. Bildirilir ki, vulkan rayonundakı bütün uçuşların marşrutları dəyişdirilib və Anak-Karakataunun ətrafındakı 5 kilometrlik radiusda uçuş qadağası tətbiq edilib.
İndoneziyanın “AirNav” Dövlət Aeronaviqasiya Agentliyinin məlumatında qeyd edilir ki, Karakatau vulkanının püskürdüyü külün həyəcan səviyyəsi qırmızı həddə çatdığına görə, ərazidə bütün marşrutların istiqaməti dəyişdirilib.
Xatırladaq ki, dekabrın 22-də axşam İndoneziya sahillərinə sunami dalğaları çatıb. Təbii fəlakət nəticəsində Lampunq və Banten əyalətlərində 429 nəfər həlak olub, 150 nəfər itkin düşüb, 1400 nəfər müxtəlif dərəcəli xəsarətlər alıb, 17 minədək insan yaşayış yerlərini tərk etməyə məcbur olub.
Sunaminin səbəbi kimi, vulkan püskürməsi nəticəsində Anak-Karakatau dağının ətəklərində baş verən torpaq sürüşməsi və lava axını göstərilir.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
