İNSANLARA DİQQƏT VƏ QAYĞI AZƏRBAYCANIN DÖVLƏT SİYASƏTİNİN ANA XƏTTİDİR
AZƏRTAC-ın müxbiri xəbər verir ki, Prezident İlham Əliyevdən sitat gətirilərək söylənən bu fikir aprelin 30-da Kürdəmirdə əhalinin sosial müdafiəsi mərkəzi üçün ayrılmış binanın açılış mərasimində səslənmişdir.
Rayon ictimaiyyəti nümayəndələrinin, ağsaqqalların və qonaqların iştirak etdikləri tədbirdə Kürdəmir Rayon İcra Hakimiyyəti başçısının sosial-iqtisadi məsələlər üzrə müavini Arzu Şahbazov və digər çıxış edənlər son illər rayonda tikinti-quruculuq işlərinin geniş vüsət aldığını, müxtəlif təyinatlı yeni inzibati binaların istifadəyə verildiyini, əhaliyə göstərilən xidmətlərin müasir tələblərə uyğun təşkil olunduğunu bildirmiş və butün bunlara görə ölkəmizdə sürətli sosial-iqtisadi inkişafın təşkilatçısı olan Prezident İlham Əliyevə minnətdarlıqlarını ifadə etmişlər.
Əmək və Əhalinin Sosial Müdafiəsi Nazirliyinin şöbə müdiri Vüqar Həsənov çıxışında inzibati binanın açılış mərasiminin ümummilli lider Heydər Əliyevin 85 illik yubileyi günlərinə təsadüf etdiyini vurğulayaraq bu gün Azərbaycanda böyük tikinti-quruculuq işlərinin aparıldığını söyləmiş, bütün bunları ölkəmizdə həyata keçirilən sosial-iqtisadi inkişaf strategiyasının uğurlu nəticələrinin bariz nümunəsi kimi dəyərləndirmişdir. İnsanların həyat səviyyəsinin, maddi rifah halının yaxşılaşdırılması, onların sosial müdafiəsi sahəsində ulu öndərin yürütdüyü siyasətin Prezident İlham Əliyev tərəfindən uğurla davam etdirildiyini diqqətə çatdıran natiq, yeni inzibati binanın əhaliyə daha yüksək səviyyədə xidmət göstərməyə imkan verəcəyini bildirmişdir.
Rayon icra hakimiyyətinin başçısı Fəxrəddin Məlikov mərasimdə çıxış edərək sosial müdafiə mərkəzində çalışanları hər cür şəraiti olan yeni iş yerinə köçmələri münasibətilə təbrik etmiş, Prezident İlham Əliyevin diqqət və qayğısı sayəsində son illər rayonda görülmüş işlərdən, həyata keçirilən layihələrdən danışmışdır. Göstərmişdir ki, açılan istehsal sahələri, tikilən yeni binalar insanların həyat səviyyəsinin yüksəldilməsinə, müasir standartlara uyğun iş şəraitinin yaradılmasına xidmət edir.
Sonra inzibati binanın rəmzi qırmızı lenti kəsilmiş, qonaqlar burada yaradılmış iş şəraiti ilə tanış olmuşlar. Əmək və Əhalinin Sosial Müdafiəsi Nazirliyinin sifarişi ilə “Qafqaz Tikinti” MMC tərəfindən yenidən qurulmuş və əsaslı təmir işləri aparılmış ikimərtəbəli, 16 otaqdan ibarət inzibati bina müasir işıqlandırma və istilik sistemləri ilə təmin edilmiş, iş otaqları yeni inventar və avadanlıqla tam təchiz olunmuşdur.
######
