İPƏK YOLUNUN BƏRPASI

10.08.2003 [03:05]
Çap et
A⁺ A^-

Avropa-Qafqaz-Asiya (TRASEKA) nəqliyyat dəhlizinin – İpək Yolunun Azərbaycan ərazisindən keçən hissəsində intensiv işlər davam edir.

Nəqliyyat Nazirliyi “Nəqliyyatservis” departamentinin xarici əlaqələr və investisiya şöbəsinin müdiri Nazim Qasımov AZƏRTAC-ın müxbirinə demişdir ki, möhtərəm Prezidentimiz Heydər Əliyevin tarixi İpək Yolunun bərpası naminə apardığı uzaqgörən siyasət artıq reallaşmaq üzrədir. 46 kilometrlik Ələt-Qazıməmməd avtomobil yolunun yenidənqurulması ilin axırınadək başa çatacaqdır. Bakı-Ələt yolunun əsaslı təmiri isə gələn il qurtaracaqdır.

94 kilometrlik Gəncə-Qazax yolunun Gəncə-Şəmkir hissəsinin 21-ci kilometrində torpaq, asfalt, körpü-tikinti işləri davam edir. Bu yolun bərpası və istismara verilməsi 2005-ci il üçün nəzərdə tutulmuşdur.

Tarixi İpək Yolunun –503 kilometrlik digər hissələrində layihə, təhqiqat və sənədləşdirmə işləri aparılır.