İsmayıllı, 31 avqust, AZƏRTAC

İsmayıllı tam orta məktəblərini bu il 777 nəfər bitirib. Onların 400 nəfəri ali məktəblərə sənəd verib və 337 nəfər qəbul olunub. Bir nəfər məzun 700 bal toplayaraq ən yüksək nəticə əldə edib. 25 nəfər 600-dən yuxarı, 57 nəfər 500-600 arası balla tələbə adını qazanıb.

AZƏRTAC xəbər verir ki, bu məlumat avqustun 31-də rayon icra hakimiyyətinin və təhsil şöbəsinin birgə təşkilatçılığı ilə ötən dərs ilinin yekunlarına həsr olunan təhsil bayramında səsləndirilib. Bayram tədbirində yüksək balla ali məktəblərə daxil olan abituriyentlər, onların müəllimləri, rayon ziyalıları və qonaqlar, o cümlədən Belarusun Nesvij rayon Xalq Deputatları Sovetinin sədri Valeri Lazyukun rəhbərliyi ilə İsmayıllıya gələn nümayəndələr, Milli Məclisin deputatı Novruzəli Aslanov və başqaları iştirak ediblər.

Rayon rəhbərləri və qonaqlar, habelə yüksək nəticə ilə ali məktəblərə daxil olanlar əvvəlcə şəhərin mərkəzində Ümummilli Liderimizin abidəsini ziyarət edərək önünə tər çiçəklər qoyublar.

Sonra tədbirin keçirildiyi şəhər mədəniyyət evinin foyesində təşkil edilən, İsmayıllının təhsil sahəsindəki uğurlarını əks etdirən sərgiyə baxış keçirilib.

Bayram tədbiri məktəblilərin ifasında dövlət himninin səsləndirilməsi ilə başlayıb. Rayon icra hakimiyyətinin başçısı Mirdaməd Sadıqov, deputat Novruzəli Aslanov, təhsil şöbəsinin müdiri Rasim Orucov və başqaları bayram tədbirində çıxış edərək yüksək nəticə qazanan abituriyentləri təbrik edib, təhsildə, ümumən həyatlarında onlara uğurlar arzulayıblar. Ümummilli lider Heydər Əliyevin rəhbərliyi ilə hazırlanan dövlət təhsil siyasətinin prioritet istiqamətlərindən danışan natiqlər diqqəti Prezident İlham Əliyevin dediyi “Təhsil Azərbaycanın davamlı inkişaf strategiyasının ən öncül istiqamətlərindən biridir” fikrinə cəlb edib, bu gün ölkəmizdə, o cümlədən İsmayıllıda təhsil sahəsində qazanılan uğurlardan danışıblar.

Bayram tədbirində 700 bal toplayan Lahıc qəsəbə tam orta məktəbin məzunu Vahab Cəbrayılov böyük uğurlar qazanan məzunlar adından çıxış edərək respublikamızda təhsilə göstərilən dövlət qayğısı üçün Prezident İlham Əliyevə minnətdarlığını bildirib. V.Cəbrayılov ona dərs deyən müəllimlərə təşəkkür edərək çıxışını bu sözlərlə bitirib: “Mən dünyada müəllim adından yüksək, şərəfli bir ad tanımıram”.

Təhsil bayramında 700 bal toplayan Vahab Cəbrayılov, 695 bal toplayan 6 saylı tam orta məktəbin məzunu Murad Ağazadə, habelə 3 nəfər qızıl, 1 nəfər gümüş medal alan məzunlara və onların təhsil aldıqları məktəblərə xüsusi hədiyyələr verilib. 7 nəfər qocaman və gənc müəllimə qiymətli hədiyyələr təqdim edilib. Habelə 500-600 və ondan çox bal toplayanların hamısı mükafatlandırılıb.

Sonda “Niyal” instrumental ansamblının ifasında konsert olub.