Jonathan Bar: Orta Dəhlizin inkişafı yeni investisiya imkanları yaradır
Bakı, 25 sentyabr, AZƏRTAC
Orta Dəhlizin inkişafı regionun nəqliyyat və logistika imkanlarının genişləndirilməsi ilə yanaşı, ticarət, sənaye və investisiya sahələrində də yeni perspektivlər yaradır.
AZƏRTAC xəbər verir ki, bunu “Apollo” şirkətinin icraçı direktoru Jonathan Bar İkinci Azərbaycan Beynəlxalq İnvestisiya Forumu çərçivəsində keçirilən “Orta Dəhliz: ticarət, sənaye və əlaqə potensialının açılması” mövzusunda keçirilən paneldə çıxışında qeyd edib.
J.Bar bildirib ki, qlobal iqtisadi və geosiyasi proseslər fonunda alternativ nəqliyyat və logistika marşrutlarına maraq artır. Bu baxımdan Mərkəzi Asiya, Xəzər dənizi və Cənubi Qafqaz üzərindən keçən marşrutların inkişaf etdirilməsi beynəlxalq ticarət əlaqələrinin şaxələndirilməsi baxımından əhəmiyyətlidir.
“Apollo”nun icraçı direktoru qeyd edib ki, Orta Dəhlizin səmərəli fəaliyyəti üçün nəqliyyat infrastrukturu ilə yanaşı, limanların, dəmir yollarının, enerji və digər əlaqəli infrastrukturun inkişafına investisiyaların artırılması vacibdir.
O vurğulayıb ki, Azərbaycan əlverişli coğrafi mövqeyi və mövcud infrastruktur imkanları ilə Orta Dəhlizin inkişafında mühüm rol oynayır. Azərbaycanın Mərkəzi Asiya ilə Avropa arasında ticarət və investisiya əlaqələrinin genişləndirilməsində əhəmiyyətli potensialı var.
J.Bar bildirib ki, özəl kapitalın bu proseslərə cəlb edilməsi iri infrastruktur layihələrinin maliyyələşdirilməsi və regional iqtisadi əlaqələrin gücləndirilməsi baxımından mühüm əhəmiyyət daşıyır. Bu istiqamətdə dövlət və özəl sektor arasında əməkdaşlığın genişləndirilməsi yeni layihələrin reallaşdırılmasına imkan verə bilər.
O əlavə edib ki, Orta Dəhlizin inkişafı yalnız tranzit imkanlarının artırılması deyil, həm də marşrut boyunca yerləşən ölkələrdə yeni sənaye və biznes imkanlarının yaradılması, investisiyaların cəlb edilməsi və iqtisadi artımın dəstəklənməsi baxımından əhəmiyyətlidir.
Bölmənin digər xəbərləri
