KALMIKİYA XURALI FEDERASİYA ŞURASINDAKI NÜMAYƏNDƏSİNİ GERİ ÇAĞIRMIŞDIR

10.06.2006 [11:26]
Çap et
A⁺ A^-

AZƏRTAC “Novosti” agentliyinə istinadla xəbər verir ki, Kalmıkiya Xalq Xuralı Federasiya Şurasındakı nümayəndəsi Levon Çaxmaxçyanın səlahiyyətinə vaxtından əvvəl xitam verməyi qərara almışdır. İclasda iştirak etmiş 19 deputatdan 18-i senatorun geri çağırılmasına səs vermişdir.

İyunun 3-də Federasiya Şurasının sədri Sergey Mironov Kalmıkiya Xuralına onun geri çağırılması haqqında təqdimat göndərmişdir. Bir gün əvvəl Çaxmaxçyan, habelə onun başçılıq etdiyi Rusiya-Ermənistan İşgüzar Əməkdaşlıq Assosiasiyasının baş mühasibi İqor Aruşanov “Transaero” aviaşirkətinin ofisində həbs olunmuşdur. Onların çantasından 300 min dollar aşkar edilmişdir.

Rusiya Baş prokurorluğu hesab edir ki, Çaxmaxçyan Hesablama Palatasında baş vermiş korrupsiya qalmaqalının iştirakçısıdır. Onun iyunun 3-də həbsə alınan kürəkəni Armen Ohanesyan bu palatada işləyirdi.

Baş prokuror əvəzi Yuri Biryukov iyunun 6-da Ali Məhkəmədən Çaxmaxçyanın əməllərində cinayət tərkibi olub-olmadığı barədə rəy verməyi xahiş etmişdir.