Bakı, 19 fevral, AZƏRTAC

Bakı şəhərinin Səbail rayonunda 2015-ci ildə sosial-iqtisadi inkişaf istiqamətində görülmüş işlərə yekun vurulub, 2016-cı il üçün qarşıda duran vəzifələr müzakirə edilib.

Hesabat yığıncağında məruzə ilə çıxış edən Səbail Rayon İcra Hakimiyyətinin başçısı Eldar Əzizov ötən il Azərbaycan Prezidenti İlham Əliyevin rəhbərliyi ilə respublikanın sosial-iqtisadi inkişafı sahəsində əldə olunmuş nailiyyətlər barədə məlumat verib, 2015-ci il ərzində rayonda görülmüş işləri təhlil edərək həlli vacib olan problemlərin aradan qaldırılması yollarından danışıb. O, Prezidentin ölkədə sahibkarlığın inkişafı, sahibkarlara yaradılan süni maneələr və digər amillərin aradan qaldırılması, onlara fəaliyyətləri üçün kömək göstərilməsi ilə bağlı dövlət qurumları və yerli icra strukturları qarşısında duran vəzifələr barədə məlumat verib. Qeyd olunub dövlət başçısının çıxışından sonra Səbail rayonunda da bu istiqamətdə müvafiq işlər həyata keçirilib, xüsusi qərargah yaradılıb, rayonda fəaliyyət göstərən sahibkarlarla görüşdə onların müraciət və təklifləri dinlənilib, işlərinə mane olan amillərin aradan qaldırılması üçün anonim sorğu keçirilib, “Qaynar xətt” yaradılıb.

6 nömrəli orta məktəbin direktoru, Əməkdar Müəllim Gülşən Orucova çıxış edərək bildirib ki, məktəbin kollektivinin qərarı ilə bu təhsil ocağında “İlham Əliyev və Azərbaycan - inkişaf və perspektivlər” mövzusunda elmi-praktiki konfrans keçirilməsi ilə bağlı hazırlıq işləri görülür.

Səbail Rayon İcra Hakimiyyəti başçısının müavini Eldar Ağayev 2015-ci il ərzində rayonda görülən işlər barədə məlumat verib. Qeyd olunub ki, 2015-ci ildə rayonun iri sənaye müəssisələri tərəfindən 15 milyard 068.8 milyon manatlıq məhsul istehsal edilib və ya əvvəlki ilin müvafiq dövrü ilə müqayisədə 0.8 faiz artıb. İri nəqliyyat müəssisələri tərəfindən görülən iş və xidmətlərin həcmi 369.8 milyon manat və ya əvvəlki ilin müvafiq dövrünə nisbətən 2.3 faiz çox olub. Rabitə müəssisələri tərəfindən görülmüş iş və xidmətlərin dəyəri 133.3 milyon manat və ya əvvəlki ilin müvafiq dövrü ilə müqayisədə 2.8 faiz çox olub. Bütün maliyyə mənbələri hesabına əsas kapitala investisiya 7 milyard 370.3 milyon manat olub ki, bu da əvvəlki ilin müvafiq dövrü ilə müqayisədə 32.4 faiz çoxdur.

2015-ci ildə rayonun pərakəndə ticarət şəbəkəsindən əhaliyə 389.5 milyon manat məbləğində və ya ötən ilin eyni dövründən 4.3 faiz çox istehlak malları satılıb, xidmət müəssisələri tərəfindən əhaliyə 300.5 milyon manatlıq pullu xidmət göstərilib ki, bu da 2014-cü ilin müvafiq dövrü ilə müqayisədə 4.6 faiz çoxdur. Ötən ildə əhaliyə 129.1 milyon manatlıq və ya əvvəlki ilin eyni dövrünə nisbətən 11.1 faiz çox iaşə xidmətləri göstərilib.

2015-ci ildə Səbail rayonunda çalışan işçilərin sayı 111371 nəfər, orta aylıq əməkhaqqının məbləği isə 1141.6 manat olub ki, bu da əvvəlki illə müqayisədə 17.2 faiz çoxdur. Keçən il Səbail rayonu ərazisində 5839 yeni iş yeri açılıb ki, bunlardan 3239-u daimi iş yerləridir.

Bildirilib ki, Badamdar şosesində 2,2 kilometr məsafədə yolun 3 metrədək genişləndirilməsi, təmiri və asfaltlaşdırılması ilə bağlı işlər başa çatdırılıb, Badamdar qəsəbəsində su və kanalizasiya xətlərinin yenidən qurulması, Tofiq Məmmədov və Göyüş Qarayev küçələrinin kəsişməsində yerləşən çoxmərtəbəli dörd yaşayış binasının həyətində “Abad məhəllə” yaradılması ilə bağlı işlərə başlanılıb. Rayon icra hakimiyyəti tərəfindən 2015-ci ilin sonundan etibarən Bibiheybət qəsəbəsində “Şıx” ərazisindəki dağ massivində 50 hektar sahədə “Ekoloji park”ın yaradılması işlərinə başlanılıb. Ötən il ölkəmizdə Heydər Əliyev Fondunun vitse-prezidenti, Ətraf Mühitin Mühafizəsi üzrə Beynəlxalq Dialoq Təşəbbüsünün (IDEA) təsisçisi Leyla Əliyevanın təşəbbüsü ilə start götürmüş “Ümumrespublika Yaşıllaşdırma” marafonu layihəsinin ikinci mərhələsi çərçivəsində keçirilən ağacəkmə aksiyaları zamanı 7 min yeni ağac, 35 min dekorativ gül kolu, 5 min kvadratmetr sahədə qazon otu əkilib, əvvəl əkilmiş ağaclara qulluq göstərilib.

Yığıncaqda iştirakçılar adından Prezident İlham Əliyevə müraciət qəbul olunub.

Hesabat iclasında Prezident Administrasiyasının məsul işçisi Tağı Tağıyev, Milli Məclisin deputatı, YAP Səbail rayon təşkilatının sədri Şəmsəddin Hacıyev və digər qonaqlar iştirak ediblər.