Tovuz, 31 iyul (AZƏRTAC). Kartof taxıldan sonra ikinci mühüm ərzaq məhsulu sayılır. Respublikamızda bu məhsul əsasən Gədəbəy, Daşkəsən, Göygöl, Şəmkir, Tovuz, Lerik, Masallı, Cəlilabad və Qusar rayonlarında geniş becərilir.

Hazırda bir sıra ölkələrdə kartofun hektardan məhsuldarlığı yüksək aqrotexniki şəraitdə becərildikdə və intensiv sortlardan istifadə etdikdə 500-600 sentnerə çatır. Azərbaycanda isə məhsuldarlıq orta hesabla hektardan 150 sentner təşkil edir.

Məhsuldarlığın yüksəldilməsində yeni texnologiyaların tətbiqi, intensiv sortlardan istifadə ilə yanaşı, kartof bitkisinin vegetasiya müddətində, istehsal edilmiş məhsulun isə saxlanma yerlərində zərərli orqanizmlərdən mühafizəsi mühüm əhəmiyyət daşıyır. Hazırda kartof bitkisinin zərərli orqanizmləri arasında potensial təhlükəli növ olan kartof güvəsi vegetasiya müddətində və saxlanma dövründə vurduğu ziyana görə ilk yerdə durur.

Vəziyyətin ciddiliyini nəzərə alan Kənd Təsərrüfatı Nazirliyi yanında Dövlət Fitosanitar Nəzarəti Xidmətinin Respublika Bitki Mühafizəsi Mərkəzi tərəfindən bu il Tovuz rayonunda kartof güvəsinin yayılmasının qarşısının alınması və yayılma ocaqlarının məhv edilməsi üzrə milli proqramın həyata keçirilməsinə başlanılıb.

Məqsəd yaxın illərdə təhlükəli zərərvericinin yayılma ocaqlarının və vurduğu ziyanın minimuma endirilməsindən ibarətdir.

Cari ildə Tovuz rayonu üzrə 7244 hektar sahədə kartof əkilib. Hazırda rayonun aran hissəsində yerləşən kartof əkinlərinin 50-60 faizində məhsul tədarük olunub, qalan sahələrdə məhsul yığımı davam etdirilir.

Tovuz Rayonlararası Ərazi Kənd Təsərrüfatı İdarəsinin rəisi Canpolad Qəhrəmanov AZƏRTAC-a bildirib ki, məhsulun təhlükəli zərərvericisi sayılan kartof güvəsinə qarşı Kənd Təsərrüfatı Nazirliyi tərəfindən həyata keçirilən kimyəvi mübarizə tədbirləri nəticəsində zərərvericinin vurduğu itkinin miqdarı keçən illə müqayisədə 97 faizədək azalıb. Nəticədə adi toxum əkilmiş sahələrdə məhsuldarlıq hektardan 180-250 sentner, yüksək reproduksiyalı toxum əkilmiş sahələrdə isə hektardan 450-550 sentner olmaqla rekord həddə çatıb.

Rayonun Alakol kəndində 60 hektar sahədə kartof yetişdirən sahibkar Zabit Musayev hektardan 450-500 sentner məhsul əldə edib. Alakol kəndindən digər sahibkar Natiq Musayev də kartof yetişdirdiyi 39 hektar sahənin hər hektarından 400-450 sentner məhsul əldə edib.

Rayon rəhbərliyi, fermerlər və digər torpaq mülkiyyətçiləri kartof güvəsinə qarşı həyata keçirilən milli proqramın müsbət nəticələrinə və səmərəli mübarizə tədbirlərinə görə Kənd Təsərrüfatı Nazirliyinə və onun müvafiq qurumlarına minnətdarlıqlarını bildirirlər.