Körfəz ölkələri ilə diplomatik qalmaqala səbəb olan livanlı nazir istefa verib
Qahirə, 19 may, AZƏRTAC
Körfəzin ərəb ölkələri ilə diplomatik qalmaqala səbəb olan Livanın xarici işlər naziri Şərbəl Vəhbənin istefa ərizəsi yazdığı bildirilir.
AZƏRTAC xəbər verir ki, livanlı nazirin ölkəsinin donoru olan Səudiyyə Ərəbistanı, Birləşmiş Ərəb Əmirlikləri, Küveyt və Bəhreynlə münasibətləri gərgin həddə çatdıran bəyanatı ərəb ölkələrində birmənalı qarşılanmayıb.
Ş.Vəhbə televiziya kanallarından birinə müsahibəsində Körfəzin ərəb ölkələrini, xüsusən Səudiyyə Ərəbistanını Suriya və İraqda İŞİD terror təşkilatının fəaliyyətini dəstəkləməkdə ittiham edib. Onun bəyanatından dərhal sonra Livanın Ər-Riyad, Manama və Küveytdəki səfirləri bu dövlətlərin Xarici İşlər nazirliklərinə çağırılıb və onlardan izahat tələb olunub. Səudiyyə Ərəbistanı isə livanlı nazirin sözlərini “rüsvayçı açıqlama” adlandırıb.
Gərginliyi azaltmaq istəyən Livan Prezidenti Mişel Aun bildirib ki, nazirin bəyanatı dövlətin rəsmi mövqeyini əks etdirmir.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
