KXDR Koreya Respublikası ilə keçiriləcək işçi görüşünün vaxtının dəyişdirilməsini istəyir
Bakı, 4 aprel, AZƏRTAC
Koreya Xalq Demokratik Respublikası (KXDR) bu gün keçirilməsi planlaşdırılan birgə işçi görüşünün vaxtının dəyişdirilərək aprelin 5-nə təyin edilməsi üçün Koreya Respublikasına müraciət edib. Hər iki respublikanın nümayəndələrinin bu görüşü aprelin 27-də baş tutacaq Koreyaarası birgə sammitə hazırlıq xarakteri daşıyır.
AZƏRTAC TASS agentliyinə istinadla xəbər verir ki, altı nəfərdən ibarət olacaq KXDR nümayəndə heyətinin tərkibi haqqında informasiyanın danışıqlar günü təqdim ediləcəyi barədə bildiriş də müraciətdə öz əksini tapıb. Koreya Respublikasının Birləşmə nazirliyinin bu təkliflərlə razılaşdığı qeyd edilir.
Bildirilib ki, Seul yeddi nəfərdən ibarət olacaq nümayəndə heyətinin tərkibi barədə Pxenyanı məlumatlandırıb. Nümayəndə heyətinə ölkə prezidentinin protokol məsələləri üzrə köməkçisi Ço Han Qi rəhbərlik edəcək.
İşçi görüşündə iki ölkə liderləri arasında baş tutacaq danışıqların KİV-lərdə işıqlandırılması, təhlükəsizlik və protokol məsələlərinin müzakirə edilməsi nəzərdə tutulub.
Bölmənin digər xəbərləri
