LAÇIN RAYONUNUN İŞĞALINDAN 16 İL ÖTÜR
AZƏRTAC xəbər verir ki, Ağcabədi rayonunun Taxtakörpü adlanan ərazisində yerləşən Laçın Rayon İcra Hakimiyyətində rayonun Ermənistan silahlı qüvvələri tərəfindən işğal edilməsinin 16-cı ildönümü ilə əlaqədar tədbir keçirilmişdir.
Tədbir iştirakçıları əvvəlcə ulu öndər Heydər Əliyevin büstünün və Şəhidlər abidəsinin önünə gül-çiçək qoymuşlar.
Tədbirdə Laçın Rayon İcra Hakimiyyətinin başçısı Ramiz Cəbrayılov çıxış etmişdir. Bildirmişdir ki, 1992-ci il mayın 18-də Ermənistan hərbi birləşmələri tərəfindən Laçın rayonunun işğal edilməsi nəticəsində 127 yaşayış məntəqəsində 13745 fərdi ev, 48 sənaye, 63 kənd təsərrüfatı obyekti, 217 mədəni-maarif, 101 məktəb, 5 məktəbdənkənar tərbiyə müəssisəsi, 142 səhiyyə, 460 ticarət obyekti, 30 rabitə qovşağı, peşə məktəbi, teatr binası, tarix-diyarşünaslıq muzeyi məhv edilmiş, ümumilikdə rayona külli məbləğdə ziyan dəymişdir. Rayonun 58229 nəfər əhalisi məcburi köçkün düşmüşdür. İşğal zamanı 333 nəfər laçınlı şəhid, 225 nəfər isə əlil olmuşdur.
Natiq bildirmişdir ki, laçınlılar Ermənistan-Azərbaycan, Dağlıq Qarabağ münaqişəsinin Azərbaycan Prezidenti İlham Əliyevin məqsədyönlü daxili və xarici siyasəti nəticəsində ədalətli həllinə, işğal altında olan torpaqlarımızın, o cümlədən Laçın rayonunun erməni təcavüzkarlarından azad ediləcəyinə qəlbən inanırlar.
Tədbirdən sonra şəhidlərin ruhuna ehsan süfrələri açılmışdır. Ağcabədi, Bərdə, Yevlax, Mingəçevir, Naftalan, Beyləqan, Kürdəmir rayonlarında məskunlaşan Laçından olan şəhid ailələrinə, əlillərə və imkansızlara ərzaq yardımı edilmişdir.
