Latviyada təmir işləri zamanı 145 sovet əsgərinin nəşi aşkar edilib
Riqa, 24 aprel, AZƏRTAC
Latviyanın Saldus diyarında yolun təmiri zamanı İkinci Dünya müharibəsi dövründə həlak olmuş 145 sovet əsgərinin nəşi aşkar edilib.
AZƏRTAC xəbər verir ki, kənd təsərrüfatı ehtiyacları üçün istifadə edilən yolun kənarında xəndək qazılarkən orada insan qalıqları aşkar edilib və bu barədə dərhal “Leqenda” axtarış dəstəsinə məlumat verilib.
Axtarış dəstəsinin rəhbəri Talis Eşmitsin sözlərinə görə, dəstə üzvləri bazar günü hadisə yerinə gəlib və orada 145 skeleti ekshumasiya ediblər.
Talis Eşmits daha sonra bildirib ki, 2003-cü ildə elə həmin yolun qarşı tərəfində 140 insan nəşi tapılıb. Bu insanların sovet əsgərləri olması onların üzərində sovet hərbi təltifləri olduğuna görə müəyyən edilib. Bazar günü hadisə yerində beş sovet medalı da tapılıb. Bu medallar həlak olanların şəxsiyyətini müəyyən etməyə kömək edə bilər.
Burada həlak olmuş əsgərlərin sayı 300 nəfərdən çox olması ehtimal edilir, çünki qəbirlərin yeri yolun altında da davam edir. 1945-ci ilin mart ayında bu ərazidə sovet və alman qoşunları arasında intensiv döyüşlər may ayına qədər davam edib.
Nigar Cəfərli
AZƏRTAC-ın xüsusi müxbiri
Riqa
Bölmənin digər xəbərləri
