LAYİHƏ YENİ İŞ YERLƏRİ AÇMAĞA İMKAN VERƏCƏKDİR
Azərbaycan hökuməti ilə Beynəlxalq İnkişaf Assosiasiyası arasında imzalanmış maliyyə razılaşması əsasında ölkəmizdə həyata keçirilən “İkinci Kənd Təsərrüfatının İnkişafı və Kreditləşməsi Layihəsi”nin həyata keçirildiyi qısa müddətdə respublikamızın 10 rayonunda özəl baytarlıq xidməti məntəqələri, torpaq mülkiyyətçilərinə, fermerlərə, kənd yerlərində yaşayan kiçik və orta sahibkarlara xidmət göstərən digər obyektlər işə düşmüşdür.
Kənd Təsərrüfatı Nazirliyi yanında Kənd Təsərrüfatı Kreditləri üzrə Dövlət Agentliyindən AZƏRTAC-a bildirmişlər ki, layihənin icra olunduğu qısa müddətdə 250-dək yeni iş yeri açılmışdır.
Layihənin əsas məqsədi fermerlərin və kənd təsərrüfatı üzrə kiçik və orta istehsal gücünə malik emal-sənaye müəssisələrinin maliyyə, məsləhət və baytarlıq xidmətləri daxil olmaqla, kənd təsərrüfatına dəstək xidmətlərindən yararlanma imkanlarının genişləndirilməsi, kənd yerlərində bazar təmayüllü investisiyaların stimullaşdırılması yolu ilə məhsuldarlığın və gəlirlərin daha da artırılmasıdır.
Kənd təsərrüfatı biznes xidmətləri, kənd təsərrüfatına dəstək və idarəetmə komponentlərindən ibarət layihənin həyata keçirilməsinə 57 milyon 391 min ABŞ dolları məbləğində vəsait xərclənəcəkdir. Bunun 41 milyon 545 min dollarını Beynəlxalq İnkişaf Assosiasiyası ilə Azərbaycan hökumətinin sərmayəsi təşkil edəcəkdir. Maliyyə vəsaitinin qalan hissəsi Yaponiyanın ayırdığı qrant, kreditdən bəhrələnən fermerlər və “Revolver Fondu” hesabına formalaşacaqdır.
Bölmənin digər xəbərləri
