Mən fəxr edirəm ki, azərbaycanlıyam...
Bakı, 10 may, AZƏRTAC
Tarixdə şəxsiyyətlər çoxdur, lakin ümummilli lider Heydər Əliyev kimi ölümündən sonra belə, nüfuzu artan şəxsiyyətlərə nadir hallarda rast gəlmək olar. Onun “Mən fəxr edirəm ki, azərbaycanlıyam” kəlamı bu gün vətənpərvərlərin şüarına çevrilib. Vətəni, xalqı üçün çalışan, ürəyi torpaq, yurd sevgisi ilə döyünən Ulu Öndərin nümunəvi fəaliyyəti, sadəliyi və səmimiliyi böyükdən-kiçiyə hər kəsin qəlbində ona dərin məhəbbət hissi yaradıb. Vətənin mərd oğlu bütün çətinliklərə rəğmən xalqı öz arxasınca aparmağı, ölkəni düşdüyü böhran vəziyyətindən xilas etməyi bacarıb. Onun müdrikliyi, cəsarəti və vətən sevgisi gənclərimiz üçün örnəkdir.
Bu sözləri AZƏRTAC-a mayın 10-da ulu öndər Heydər Əliyevin xatirəsini yad etmək üçün Fəxri xiyabana gələn Azərbaycan Milli Elmlər Akademiyasının Torpaqşünaslıq və Aqrokimya İnstitutunun torpaq eroziyası laboratoriyasının rəhbəri, aqrar elmlər üzrə fəlsəfə doktoru Zakir Əliyev deyib.
O, Ümummilli Liderlə bağlı xatirələrini bölüşüb, bu dahi şəxsiyyətlə görüşdüyünü, dəyərli tövsiyələrindən faydalandığını deyib. Z.Əliyev Azərbaycan elminin dünyaya inteqrasiyasında, elmi nailiyyətlərin qazanılmasında ulu öndər Heydər Əliyevin danılmaz rolu olduğunu vurğulayıb.
Alim xalqımızın Heydər Əliyev dühasını öz qəlbində daim yaşadacağını və hər kəsin onun arzuladığı Azərbaycan naminə çalışmalı olduğunu diqqətə çatdırıb.
Bölmənin digər xəbərləri
