Migel Dias-Kanel Kubanın yeni lideri seçilib
Bakı, 19 aprel, AZƏRTAC
Migel Dias-Kanel Kubanın Xalq Hakimiyyəti Milli Məclisi (ölkə parlamenti) tərəfindən dövlət başçısı postuna seçilib və ölkənin yeni lideri olub.
AZƏRTAC xarici KİV-lərə istinadla xəbər verir ki, bundan əvvəl Dias-Kanel Dövlət Şurası sədrinin birinci müavini vəzifəsini tutub. Onun namizədliyi aprelin 18-də parlament sessiyasının gedişində rəsmən irəli sürülüb və səsverməyə çıxarılıb. Səsvermənin nəticələri aprelin 19-da sessiyanın ikinci gününün gedişində elan edilib. 57 yaşlı Dias-Kanel yüksək dövlət postunda bu vəzifəni 2008-ci ildən tutan 86 yaşlı Raul Kastronu əvəzləyib.
Qeyd edək ki, Kuba qanunvericiliyinə əsasən Dövlət Şurasının rəhbəri parlament tərəfindən seçilir. Namizədlər üzrə Milli Komissiya bu posta öz namizədlərini irəli sürən hər bir deputatla görüşür, bundan sonra yekun siyahını təklif edir. Deputatların gizli səsverməsindən sonra seçkilərin nəticələri elan olunur.
Bölmənin digər xəbərləri
