MİLLİ QURTULUŞ GÜNÜNƏ HƏSR OLUNMUŞ TƏDBİR KEÇİRİLMİŞDİR
AZƏRTAC xəbər verir ki, iyunun 13-da “Excelsior” mehmanxanasında Dünya Azərbaycanlılarının Mədəniyyət Mərkəzi, Sabitlik və İnkişaf Mərkəzinin birgə təşkilatçılığı ilə 15 iyun - Milli Qurtuluş Gününə həsr olunmuş tədbir keçirilmişdir.
Dövlət himni səsləndirildikdən sonra “Qayıdış” filmindən fraqmentlər göstərilmişdir.
Ulu öndər Heydər Əliyevin xatirəsi bir dəqiqəlik sükutla yad edilmişdir.
Dünya Azərbaycanlılarının Mədəniyyət Mərkəzinin prezidenti, xalq şairi Söhrab Tahir çıxış edərək xatırlatmışdır ki, dünya şöhrətli siyasətçi, görkəmli dövlət xadimi Heydər Əliyevin Azərbaycan xalqının təkidli tələbi ilə hakimiyyətə qayıdışı ölkəni dəhşətli faciələrdən xilas etdi, Azərbaycanı dünya ictimaiyyətinin gözündə ucaltdı.
Milli Məclisin deputatı Həvva Məmmədova “Tarixi dönüş” məruzəsində 1993-cü ilin iyununda hakimiyyətə qayıdan dahi rəhbər Heydər Əliyevin misilsiz xidmətlərini vurğulamışdır. Qeyd etmişdir ki, dünya şöhrətli siyasi xadimin əbədiyaşar ideyalarına sadiq qalan xalqımız onun siyasi xəttini alternativsiz inkişaf xətti kimi qəbul etmişdir.
Milli Məclisin deputatı Jalə Əliyeva “Qurtuluş günündən başlanan dövlətçilik” məruzəsində Milli Qurtuluş gününün əhəmiyyətindən, onun Azərbaycan xalqının həyatında oynadığı mühüm roldan danışmış, ölkə daxilində xaos və özbaşınalığın baş alıb getdiyi, iqtisadiyyatın tənəzzülə uğradığı dövrdə ulu öndər Heydər Əliyevin xalqın tələbi ilə yenidən Azərbaycanın rəhbərliyinə qayıtmasını, onun rəhbərliyi altında respublikamızın sürətli inkişaf yolu tutmasını diqqətə çatdırmışdır.
J.Əliyeva vurğulamışdır ki, ulu öndərin uzaqgörən siyasətini Prezident İlham Əliyev yüksək səviyyədə və uğurla davam etdirir.
Çıxış edən digər natiqlər də Heydər Əliyevin zəngin və mənalı həyat yolundan, onun xilaskarlıq missiyasından söz açmış, müstəqil Azərbaycan dövlətinin sükanının etibarlı əllərdə olduğunu qeyd etmiş, xalqımızı Prezident İlham Əliyev ətrafında daha sıx birləşməyə çağırmışlar.
Vurğulamışlar ki, dahi şəxsiyyətin layiqli davamçısı Prezident İlham Əliyevin yeritdiyi məqsədyönlü siyasət sayəsində iqtisadiyyatımız sürətlə inkişaf edir. Bu gün ölkəmiz beynəlxalq aləmdə yüksək nüfuza malikdir. Bu uğurlar Heydər Əliyevin uzaqgörən siyasətinin və güclü dövlət quruculuğu strategiyasının parlaq təzahürü kimi qiymətləndirilmişdir.
Ümummilli lider Heydər Əliyevin əsasən 1993-1997-ci illərdəki fəaliyyətini əks etdirən fotoşəkillər, onun haqqında yazılmış kitablardan ibarət sərgi maraqla qarşılanmışdır.
Bir sıra ziyalılar Sabitlik və İnkişaf Mərkəzinin təsis etdiyi “Əbədi prezident” qızıl döş nişanı ilə təltif olunmuşlar.
Mərasimdə Azərbaycanın incəsənət ustaları ulu öndərlə bağlı mahnılar ifa etmiş, şeirlər söyləmişlər.
Bölmənin digər xəbərləri
