MİLLİ TƏHLÜKƏSİZLİK NAZİRİ ELDAR MAHMUDOV POLŞADA SƏFƏRDƏ OLMUŞDUR
Milli Təhlükəsizlik Nazirliyi ictimai əlaqələr mərkəzindən AZƏRTAC-a bildirmişlər ki, Azərbaycan Respublikasının milli təhlükəsizlik naziri, general-leytenant Eldar Mahmudov Polşa Respublikasının Milli Təhlükəsizlik Bürosunun rəisi Vladislav Staşiakın dəvəti ilə aprelin 17-19-da bu ölkədə rəsmi səfərdə olmuşdur.
Səfərin ilk günü Eldar Mahmudovun Polşa Respublikasının Milli Təhlükəsizlik Bürosunun rəisi Vladislav Staşiak ilə görüşü olmuşdur. Vladislav Staşiak həmkarı Eldar Mahmudovun bu səfərinin təhlükəsizlik sahəsində Polşa və Azərbaycan arasında münasibətlərin daha da inkişaf etməsində böyük önəm daşıdığını söyləmişdir.
Səmimi və mehriban qarşılandığına, yüksək qonaqpərvərliyə görə təşəkkürünü bildirən Azərbaycan Respublikasının milli təhlükəsizlik naziri Eldar Mahmudov ölkəmizdə aparılan demokratik islahatlar, təhlükəsizliyin təmin olunması, beynəlxalq terrorçuluqla, narkotiklərin qanunsuz dövriyyəsi, qanunsuz miqrasiya və transmilli mütəşəkkil cinayətkarlığın digər təhlükəli təzahürləri ilə mübarizə sahəsində görülmüş işlər, eləcə də regionda gedən proseslər, reallıqlar, yeni yanaşmalar barədə danışmış, Azərbaycanın beynəlxalq terrorçuluqla mübarizədə bundan sonra da fəal mövqedə duracağını qeyd etmişdir.
Nazir Eldar Mahmudov, həmçinin Ermənistan-Azərbaycan, Dağlıq Qarabağ münaqişəsi və onun törətdiyi fəsadlar barədə ətraflı məlumat vermiş, təcavüz nəticəsində Azərbaycan torpaqlarının işğal edilməsinin, nəzarət olunmayan həmin ərazilərdən gələn təhlükələrin nəinki Cənubi Qafqaz, habelə bütün Avropa üçün də ciddi təhdid doğurduğunu vurğulamış, münaqişənin beynəlxalq hüquq normaları çərçivəsində ədalətli həllinin vacibliyini bildirmişdir.
Görüşdə təhlükəsizlik sahəsində ikitərəfli əməkdaşlığın genişləndirilməsi istiqamətində müzakirələr aparılmış, qarışılıqlı maraq doğuran məsələlərin ekspertlər səviyyəsində davam etdirilməsinə dair razılıq əldə olunmuşdur. Təhlükəsizlik sahəsində başlanmış dialoqun davam etdirilməsi, ikitərəfli əməkdaşlığın genişləndirilməsi məqsədi ilə nazir Eldar Mahmudov həmkarı Vladislav Staşiakı Azərbaycana səfərə dəvət etmişdir. Dəvət qəbul olunmuşdur.
Həmin gün Polşa Prezidenti Lex Kaçinski Prezident sarayında Azərbaycanın milli təhlükəsizlik naziri Eldar Mahmudovu qəbul etmişdir. Polşanın dövlət başçısı Lex Kaçinski Azərbaycan Prezidenti İlham Əliyevlə dostluq əlaqələrini və hər iki ölkə rəhbərlərinin bir sıra mühüm beynəlxalq məsələlərdə ortaq mövqedən çıxış etdiklərini xüsusi vurğulamışdır. Lex Kaçinski Azərbaycanın regionun çox mühüm dövləti olduğunu və dost ölkənin beynəlxalq hüquq prinsiplərinə söykənən haqq işini bundan sonra da müdafiə edəcəyini bildirmişdir. Nazir Eldar Mahmudov Polşa Prezidentinə Azərbaycan Prezidenti İlham Əliyevin salamlarını, habelə ölkəmizə olan dost və obyektiv mövqeyinə görə təşəkkürünü çatdırmışdır. Görüşdə ölkələrimiz arasında əlaqələrin bütün istiqamətlərdə, ilk növbədə təhlükəsizlik sahəsində genişləndirilməsi mövzusunda faydalı fikir mübadiləsi aparılmışdır.
Yüksək səviyyədə keçirilmiş səfər proqramı çərçivəsində nazir Eldar Mahmudov Vladislav Staşiakın müşayiəti ilə Polşanın mühüm mədəniyyət mərkəzi kimi tanınan Krakov şəhərinə gəlmiş, burada Malapolska voyevodası Yerji Müllerlə görüşmüşdür.
Milli təhlükəsizlik naziri Eldar Mahmudov şəhərin tarixi yerləri ilə tanış olmuşdur. Bundan sonra Eldar Mahmudov İkinci Dünya müharibəsində həlak olmuş insanların xatirəsinə Polşanın Osventsim şəhərində yaradılmış Memorialı da ziyarət edərək, önünə əklil qoymuşdur.
######
 |
 |
Bölmənin digər xəbərləri
