REGİONLAR
Mingəçevir Dövlət Universitetinin “Peşəkarla görüş” layihəsinin növbəti qonağı professor Cəfər Cəfərov olub
![](/files/galleryphoto/2020/2/1200x630/159499218322479997_1200x630.png)
![](/files/galleryphoto/2020/2/1200x630/15949921831999816204_1200x630.png)
![](/files/galleryphoto/2020/2/1200x630/15949921836379641988_1200x630.png)
Bakı, 17 iyul, AZƏRTAC
İyulun 17-də Mingəçevir Dövlət Universitetində (MDU) “Peşəkarla görüş” layihəsi çərçivəsində növbəti tədbir keçirilib.
MDU-dan AZƏRTAC-a bildirilib ki, görüşün qonağı Azərbaycan Dövlət Pedaqoji Universitetinin (ADPU) rektoru, professor Cəfər Cəfərov olub.
“Müəllim hazırlığı” mövzusunda keçirilən görüşün moderatoru olan MDU-nun rektoru Şahin Bayramov tarix elmləri doktoru C.Cəfərovun bioqrafiyası barədə ətraflı danışıb, onun Moskva Dövlət Universitetində təhsil almasını diqqətə çatdırıb. 2016-cı ildən ADPU-ya rəhbərlik edən C.Cəfərovun peşəkar fəaliyyəti haqqında məlumat verən Ş.Bayramov onu ali təhsilin idarə edilməsi sahəsində təcrübəli mütəxəssis kimi xarakterizə edib.
C.Cəfərov regionda yerləşən MDU-nun tələbə, magistrant və professor-müəllim heyəti üzvlərinin iştirak etdiyi görüşə qatılmaqdan məmnunluğunu ifadə edib, pandemiya dövrünün reallıqlarına və son günlər mənfur qonşularımız tərəfindən törədilən təxribatlara toxunub.
Sonra professor “Müəllim hazırlığı” mövzusunda geniş nitq söyləyib. O, təhsilin cəmiyyətin inkişafında rolu, milli təhsil və maarifçilik ənənələrimizin qorunmasının əhəmiyyəti, müəllim hazırlığında müşahidə olunan yeni trendlərə adekvat addımlar atılmasının vacibliyi haqqında danışıb. Ulu öndər Heydər Əliyevin “Mən dünyada müəllimdən şərəfli ad tanımıram” tarixi deyimini xatırladan C.Cəfərov ölkəmizdə pedaqoji kadr hazırlığına göstərilən yüksək dövlət qayğısından, təhsildə varislik və müasirlik prinsiplərinin gözlənilməsinin vacibliyindən, milli şüurun formalaşdırılmasında müəllimlərin müstəsna xidmətlərindən bəhs edib.
Professor milli dəyərlərin qorunması, tarixi köklərimizə bağlılığın möhkəmləndirilməsi, yüksək mənəvi keyfiyyətlərin formalaşması, azərbaycançılıq məfkurəsinin aşılanması, vətənə, xalqa və dövlətə sevginin dərinləşdirilməsi baxımından müəllimlərin üzərinə böyük məsuliyyət düşdüyünü bildirib. Müəllimlərin işə qəbulu ilə bağlı şəffaf mexanizmin formalaşmasını və qəbul imtahanlarında yüksək bal toplayan gənclərin müəllimlik peşəsini seçməsini vurğulayan C.Cəfərov pedaqoji profil üzrə kadr hazırlığının keyfiyyətinin yüksəldilməsi istiqamətində ADPU-da görülən işlər barədə məlumat verib. Əmək bazarının sürətlə dəyişən tələblərindən bəhs edən qonaq gələcəyin müəllimlərini rəqəmsal bacarıqlarını və xarici dil biliklərini inkişaf etdirməyə, müəllim adını daim uca tutmağa çağırıb.
Daha sonra C.Cəfərov görüş iştirakçılarının universitet-orta məktəb əməkdaşlığının mövcud vəziyyəti, cari ilin sentyabrından tətbiq olunacaq yeni təhsil standartlarından gözləntilər, gələcəyin müəllimləri üçün vacib olan səriştələr, şagirdlərin sevimli müəllimi olmağın sirləri, ADPU ilə ABŞ-ın Corc Vaşinqton Universiteti arasında reallaşdırılan birgə magistratura proqramı və digər məsələlərə dair çoxsaylı suallarını cavablandırıb.
“Microsoft Teams” platforması üzərindən onlayn təşkil olunan səmimi görüş həm iştirakçıların, həm də qonağın böyük marağına səbəb olub.
Qeyd edək ki, layihənin əsas məqsədi MDU kollektivinin müxtəlif aktual mövzular barədə peşəkarların bilik və bacarıqlarından faydalanması üçün imkanlar yaradılmasından ibarətdir. Davamlı olaraq keçirilən görüşlərdə MDU-nun tələbələri, magistrantları, məzunları və əməkdaşları iştirak edirlər. Layihə çərçivəsində mayın 22-də BP şirkətinin Azərbaycan, Gürcüstan, Türkiyə regionunda əlaqələr, xarici işlər və strategiya üzrə vitse-prezidenti Bəxtiyar Aslanbəyli, iyunun 17-də Azərbaycan Respublikası Milli Məclisinin Elm və təhsil komitəsinin sədri, professor Bəxtiyar Əliyevlə görüş keçirilib.