MİNGƏÇEVİRDƏ 15 MAY – BEYNƏLXALQ AİLƏ GÜNÜ QEYD OLUNMUŞDUR
AZƏRTAC-ın müxbiri xəbər verir ki, 15 may - Beynəlxalq Ailə günü münasibətilə Mingəçevir şəhərindəki “Atəşgah” İstirahət Kompleksində “Toylar çələngi” adlı bayram tədbiri keçirilmişdir.
Mərasimdə iştirak edən Mingəçevir Şəhər İcra Hakimiyyətinin başçısı Mübariz Ağayev, Ailə, Qadın və Uşaq Problemləri üzrə Dövlət Komitəsinin şöbə müdiri Şücəddin Abdullayev, Mingəçevir Şəhər Qeydiyyat Şöbəsinin müdiri Məryəm Əliyeva əvvəlcə “qızıl toy”unu qeyd edən Əfəndiyevlər ailəsini və “yaqut toy”larını qeyd edən Qurbanovlar və Ağalarovlar ailəsini bayram münasibətilə təbrik etmiş, onlara uzun ömür, cansağlığı arzulamışlar.
Natiqlər qeyd etmişlər ki, ailə ümumbəşəri prinsiplər əsasında, kişi və qadının könüllü nigah ittifaqı, qarşılıqlı məhəbbəti, dostluğu, hörmət hissləri əsasında formalaşır. Ailə cəmiyyətin dayağıdır. Ərlə arvad arasında bağlanan nigah müqaviləsi rəsmi sənəddir. Nigaha daxilolma və boşanma qanunla tənzimlənir.
Toylarının 50 və 40 illik yubileylərini qeyd edən bu mərasimin qəhrəmanları yeni evlənənlərə tərbiyəvi məsləhətlər vermiş, ailənin möhkəm olmasının sirlərini öyrətmiş, ərlə arvad arasında səmimi, xoş münasibətlərin qurulmasının əhəmiyyətindən danışmışlar.
Tədbirdə “Gənc ailə sabahın ümidi, cəmiyyətin gələcəyidir”, “Erkən nigahlar və mövcud problemlər”, “Gələcək nəslin vətənpərvərlik ruhunda tərbiyələnməsində ailə, məktəb şuralarının rolu”, “Sağlam cəmiyyət, sağlam ailə” mövzularında məruzələr dinlənimişdir. Gənclərə Ailə Məcəlləsi, nigah müqaviləsinin qarşıya qoyduğu şərtlər, adət-ənənələrimiz barədə məlumatlar verilmişdir.
Çıxışlardan sonra tədbir konsert proqramı ilə davam etdirilmişdir.
