Misir nümayəndə heyəti Qəzzada atəşkəslə bağlı növbəti danışıqlar aparıb
Qahirə, 20 may, AZƏRTAC
Misir Xarici İşlər Nazirliyinin nümayəndə heyəti Ramallahda İsraillə Fələstin arasında atəşkəsə nail olunmasına dair növbəti danışıqlar aparıb.
AZƏRTAC xəbər verir ki, bu barədə “Əl Əhram” qəzeti məlumat yayıb.
Yaxın saatlarda Qəzzada atəşkəs elan ediləcəyi barədə məlumat verən mənbə bildirib ki, bu məlumatı “Fatah” hərəkatının Baş katibi Cibril Racub da təsdiqləyib. Misirin xarici işlər naziri Sami Şükrü “CNN” telekanalına müsahibəsində Fələstindəki tərəflər, o cümlədən Həmasla keçirilən müzakirələrdə münaqişənin diplomatik yolla həllinin irəli sürüldüyünü deyib. O əlavə edib ki, Qahirə, eyni zamanda, ABŞ, İsrail və Avropa ölkələrinin xarici siyasət idarələri ilə də müvafiq danışıqlar aparıb.
Misir Prezidenti Əbdülfəttah əl-Sisi aviasiya zərbələrindən zərər görmüş Qəzzanın bərpasına 500 milyon dollar məbləğində vəsait ayırıb. Bundan başqa, rəsmi Qahirə ərəb ölkələrini atəşkəsdən sonrakı bərpa işlərinə yardım etməyə çağırıb.
Hazırda Misir hökuməti fələstinli yaralıların müalicəsi üçün 11 hospital ayırıb və Qəzzaya 65 ton tibbi ləvazimat göndərib. Ərəb Parlamentinin təcili iclasında iştirak edən Körfəz ölkələri də fələstinlilərə yardım göstərməyə hazır olduqlarını bildiriblər.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
