SİYASƏT
Moskvada REA-nın müxbir üzvü Yefim Pivovarın “Rusiya-Azərbaycan münasibətləri (XX əsrin 90-cı illəri - XXI əsrin əvvəli)” monoqrafiyasının təqdimatı olmuşdur
Bakı, 16 aprel (AZƏRTAC). Rusiya Dövlət Humanitar Universitetində (RDHU) Rusiya-Azərbaycan Dostluq Cəmiyyətinin sədri, RDHU-nun rektoru, REA-nın müxbir üzvü Yefim Pivovarın “Rusiya-Azərbaycan münasibətləri (XX əsrin 90-cı illəri - XXI əsrin əvvəli)” monoqrafiyasının təqdimatı olmuşdur.
“Vestnik Kafkaza” informasiya agentliyinin baş redaktoru Aleksey Vlasov monoqrafiya haqqında danışarkən qeyd etmişdir ki, təqdim olunan əsər Azərbaycanın müasir tarixinin öyrənilməsi çərçivəsində son bir neçə ildə RDHU-da və MDU-nun tarix fakültəsində alimin rəhbərliyi altında yaxın xarici ölkələrin tarixi kafedralarının elmi kollektivlərinin apardıqları çox böyük və səmərəli işin nəticəsidir. Aleksey Vlasov demişdir ki, Y.Pivovar Rusiyanın aparıcı ali məktəblərinin elm və təhsil fəaliyyətinin yeni istiqamətinin başlanğıcında durmuşdur və məhz Azərbaycanın müasir siyasi tarixinin, Rusiya-Azərbaycan münasibətlərinin öyrənilməsində böyük müvəffəqiyyət qazanılmışdır ki, bu da belə fundamental elmi əsərin meydana çıxmasına imkan vermişdir.
Onun fikrincə, müəllif çox böyük material toplaya bilmişdir və bu monoqrafiyada müəllifin gəldiyi hər bir nəticə konkret faktlarla, konkret sənədlərlə təsdiq olunmuşdur.
Çıxış edən tarixçilər, politoloqlar və ekspertlər bu elmi əsərin əhəmiyyətini qeyd etmiş, bildirmişlər ki, ilk dəfə olaraq çoxlu məxəzlər əsasında Rusiya Federasiyası ilə Azərbaycan Respublikası arasında istər ikitərəfli münasibətlər səviyyəsində, istərsə də beynəlxalq əməkdaşlıq, o cümlədən BMT-də, ATƏT-də, habelə bir sıra regional inteqrasiya qurumlarında iki ölkənin əməkdaşlığı çərçivəsində münasibətlərin təşəkkülünün və inkişafının iyirmiillik tarixi əks etdirilmişdir.
Kitabın xüsusi bölməsi “Xəzər məsələsi”nin həlli, habelə biznes və sosial-mədəni əlaqələr sahəsində iki ölkənin qarşılıqlı fəaliyyətinə həsr olunmuşdur. Bu bölmədə iki müstəqil postsovet dövlətinin qarşılıqlı əlaqələrinin əsas istiqamətləri, o cümlədən siyasi, iqtisadi, humanitar sahələrdə birgə fəaliyyəti ətraflı təhlil edilmişdir, Azərbaycanla Rusiya arasında strateji tərəfdaşlıq münasibətlərinin qurulması mexanizmləri ardıcıl surətdə açılıb göstərilir.
Yefim Pivovar onun işini yüksək qiymətləndirdiklərinə görə tədbirin iştirakçılarına minnətdarlığını bildirmiş və qeyd etmişdir ki, geniş oxucu dairəsi üçün nəzərdə tutulmuş bu nəşr Azərbaycanla Rusiya arasında diplomatik münasibətlərin yaradılmasının 20 illiyi ərəfəsində çapdan çıxmışdır. O bildirmişdir ki, Rusiya-Azərbaycan münasibətləri postsovet məkanının digər ölkələri üçün həm də ikitərəfli münasibətlər nümunəsi hesab edilə bilər. Yefim Pivovar demişdir: “Bu münasibətlər həqiqətən də birdən-birə yaranmamışdır, uzun təşəkkül yolu keçmiş strateji tərəfdaşlıq münasibətləridir. Heydər Əliyevin və Rusiya rəhbərliyinin siyasi iradəsi sayəsində çətinlikləri aradan qaldırmaq mümkün olmuşdur. Digər tərəfdən, şübhəsiz ki, bizim mədəni əməkdaşlığımız da nümunə ola bilər. Məsələn, Beynəlxalq Humanitar Forum kimi tədbirlər, ümidvaram ki, davam etdiriləcəkdir. Rusiya-Azərbaycan Dostluq Cəmiyyəti artıq oktyabrda keçiriləcək növbəti foruma dair təkliflər hazırlayır”. RDHU-nun rektoru qeyd etmişdir ki, Rusiya-Azərbaycan Dostluq Cəmiyyəti iki ölkə və iki xalq arasında dostluğun və əməkdaşlığın möhkəmləndirilməsinə yönəldilmiş fəaliyyətini səylə davam etdirəcəkdir. Rusiya-Azərbaycan münasibətlərinin inkişafına həsr olunmuş elmi-kütləvi əsərlərin seriya ilə nəşri, digər mühüm və əlamətdar layihələr davam etdiriləcəkdir.
Asya Hacızadə
AZƏRTAC-ın xüsusi müxbiri
Moskva