Müasir Azərbaycan bəstəkarlarının əsərləri səslənib
Bakı,24 sentyabr, AZƏRTAC
Üzeyir Hacıbəyli XVII Beynəlxalq Musiqi Festivalı çərçivəsində sentyabrın 24-də Bəstəkarlar İttifaqında müasir Azərbaycan bəstəkarlarının əsərlərindən ibarət Kamera musiqisi konserti keçirilib.
Bu barədə AZƏRTAC-a Azərbaycan Bəstəkarlar İttifaqından məlumat verilib.
Bildirilib ki, konsertdən əvvəl ittifaqın sədri, AMEA-nın müxbir üzvü, Xalq artisti professor Firəngiz Əlizadə Üzeyir Hacıbəyli Beynəlxalq Musiqi Festivalının çox yüksək səviyyədə keçirildiyini qeyd edib. Firəngiz xanım diqqətə çatdırıb ki, builki geniş yubiley proqramında bir neçə tədbir – dahi bəstəkarın pedaqoji fəaliyyətinə həsr olunmuş elmi konfrans, müasir Azərbaycan bəstəkarlarının yeni kamera əsərlərindən ibarət konsert və kitab təqdimatı festival çərçivəsində Bəstəkarlar İttifaqı tərəfindən keçirilir.
Azərbaycan Bəstəkarlar İttifaqının baş məsləhətçisi Sevda Hüseynovanın aparıcılığı ilə geniş konsert proqramı təqdim olunub.
Konsertdə Üzeyir Hacıbəylinin “Sənsiz” qəzəl-romansı (ifa edir Ü.Hacıbəyli adına BMA-nın I kurs tələbəsi Nərgiz Şahbazova – vokal, konsertmeyster Ərtoğrul Balayev), Elvin Quliyevin fortepiano üçün “Noktürn” (ifa edir beynəlxalq müsabiqə laureatı Zərrin Şükür), Zərrin Şükürün “Kiçik süita” (ifa edir müəllif), Rəna Qədimovanın 2 faqot üçün “Üç baqatel” (ifa edirlər Əməkdar artist İlqar Hacıyev, İsmayıl İsmayılov), Vəfa Bağırzadənin fortepiano üçün 2 prelüd (ifa edir Leyla Əliyeva), Sevinc Əliyeva-Qəmbərovanın fortepiano üçün 2 prelüd (ifa edir Leyla Əliyeva), sənətşünaslıq üzrə elmlər doktoru, Əməkdar incəsənət xadimi Mehriban Əhmədovanın Aktau şəhərində baş vermiş təyyarə qəzasında həlak olanların xatirəsinə həsr olunmuş “Son uçuş” (sözləri Mahir Cavadlıya məxsusdur (ifa edir beynəlxalq müsabiqə laureatı Aynur İsgəndərli – vokal. Konsertmeysteri Əməkdar artist Eldar Məmmədov), Sevda Məmmədlinin violin və fortepiano üçün “Memories” (ifa edir Əməkdar artist Ceyla Seyidova violin, müəllif – piano), Rüfət Xəlilovun fortepiano və audio səs yazısı üçün “Məsafələr” (ifa edir müəllif), Aysel Kərimin “Qəhrəmanın heykəli” romansı (ifa edir Fəxri Kazım Nicat. Konsertmeyster Aynur Xəlilova), Azər Dadaşovun Üzeyir Hacıbəylinin 140 illiyinə həsr olunmuş 2 fortepiano üçün “Üzeyiri” (ifa edirlər Ü.Hacıbəyli adına BMA-nın I kurs tələbələri Ərtoğrul Balayev, Fərid Hüseynov), Üzeyir Hacıbəylinin mövzuları əsasında Caz-kompozisiya (Emil Əfrasiyab. İfa edir Ərtoğrul Balayev – piano) səslənib.
Sonunda mədəniyyət nazirinin müavini, Xalq artisti, görkəmli pianoçu Murad Hüseynov çıxış edərək beynəlxalq festival çərçivəsində Azərbaycan Bəstəkarlar İttifaqının layihələrini yüksək qiymətləndirib, əsərləri səslənən bəstəkarlara yeni yaradıcılıq uğurları arzulayıb.
Bölmənin digər xəbərləri
