Muxtar respublikada Dünya Azərbaycanlılarının Həmrəylik Günü ilə bağlı silsilə tədbirlər keçirilib
Naxçıvan, 28 dekabr, AZƏRTAC
Dünya azərbaycanlılarının həmrəyliyi, onların təşkilatlanması prosesini ulu öndər Heydər Əliyev hələ 1991-1993-cü illərdə Naxçıvan Muxtar Respublikasının rəhbəri işləyərkən diqqət mərkəzində saxlayıb. Ümummilli Liderimizin rəhbərliyi ilə 1991-ci il dekabrın 16-da Naxçıvan Muxtar Respublikası Ali Məclisi tərəfindən “31 Dekabr - Dünya Azərbaycan Türklərinin Həmrəylik və Birlik Günü haqqında” Qərar qəbul edilib. Qərara əsasən, 1991-ci ilin son günü - 31 dekabrda həmrəylik bayramı ilk dəfə muxtar respublikada kütləvi tədbirlərlə qeyd olunub.
AZƏRTAC-ın Naxçıvan bürosu xəbər verir ki, bu fikirlər Naxçıvan Dövlət Universiteti Elmi Kitabxanasında 31 Dekabr -Dünya Azərbaycanlılarının Həmrəylik Gününə həsr olunmuş dəyirmi masada səsləndirilib.
Tədbirdə universitetin rektoru, AMEA-nın müxbir üzvü Saleh Məhərrəmov qeyd edib ki, dünya azərbaycanlılarının bir amal ətrafında sıx birləşdirilməsi ideyasını irəli sürən ulu öndər Heydər Əliyev Azərbaycanda ikinci dəfə siyasi hakimiyyətə gəldiyi 1993-cü il iyunun 15-dən etibarən xaricdə yaşayan soydaşlarımızın təşkilatlanması məsələsini daim diqqət mərkəzində saxlayıb, onların tarixi Vətənlə əlaqələrinin genişlənməsinə çalışıb.
Universitetin prorektoru, dosent Rafiq Rəhimov və arxiv işi və muzeyşünaslıq kafedrasının müdiri, tarix üzrə fəlsəfə doktoru Məmməd Əliyev çıxışlarında vurğulayıblar ki, Ulu Öndərin dünya azərbaycanlılarının həmrəyliyinin, birliyinin təmin edilməsi ilə bağlı ideyaları bu gün də aktuallığını qoruyur, bu siyasət dahi şəxsiyyətin layiqli davamçısı, Prezident İlham Əliyev tərəfindən uğurla davam etdirilir, ardıcıl və qətiyyətli addımlar atılır. Dövlət başçısı Ümummilli Liderimizin ideyalarını daha da inkişaf etdirərək təkcə dünya azərbaycanlılarının birləşdirilməsi ilə kifayətlənməməyi, Azərbaycan və türk diasporlarının birləşərək amansız və məkrli düşmənə qarşı vahid cəbhədə mübarizə aparmasını tövsiyə edib.
Sonda tələbələrin sualları cavablandırılıb, mövzu ilə bağlı təkliflər dəyərləndirilib.
Qeyd edək ki, Naxçıvan Dövlət Universitetinin pedaqoji fakültəsində Dünya Azərbaycanlılarının Həmrəylik Günü və Yeni ilə həsr olunmuş əl işlərindən ibarət sərgi-müsabiqə də təşkil edilib.
Yüzdən çox əl işinin nümayiş olunduğu sərgidə universitetin texnologiya müəllimliyi ixtisası üzrə təhsil alan Aygün Əsgərova qalib olub. Həmin ixtisasın tələbələri Aytac Həsənzadə ikinci, Elmira Məmmədova isə üçüncü yerə layiq görülüb. Qaliblərə diplom və mükafatlar verilib.
X X X
Yeni Azərbaycan Partiyası Culfa Rayon Təşkilatının Dünya Azərbaycanlılarının Həmrəylik Günü münasibətilə rayon mədəniyyət sarayında keçirdiyi tədbirdə təşkilatın sədri, Naxçıvan Muxtar Respublikası Ali Məclisinin deputatı Qadir İbrahimov çıxış edərək bildirib ki, ulu öndərimiz Heydər Əliyev bütün fəaliyyəti dövründə digər sahələrlə yanaşı, dünyanın müxtəlif ölkələrindəki soydaşlarımızla əlaqələrin qurulmasına, onların milli həmrəyliyinin təmin olunması məsələsinə də diqqət yetirib, bu istiqamətdə ardıcıl tədbirlər həyata keçirib.
Qadir İbrahimov deyib: “1993-cü ildə ikinci dəfə siyasi hakimiyyətə gələn ümummilli lider Heydər Əliyevin xarici dövlətlərə səfəri zamanı həmin ölkələrdə yaşayan, fəaliyyət göstərən soydaşlarımızla görüşməsi, onların problem və qayğıları ilə yaxından maraqlanması və dəyərli tövsiyələr verməsi birliyimizin daha da gücləndirilməsinə xidmət edib. Ulu Öndərin siyasi xəttini uğurla davam etdirən Prezident İlham Əliyev də bu istiqamətdə məqsədyönlü tədbirlər həyata keçirir”.
Məruzə ətrafında çıxışlarda vurğulanıb ki, dövlətimizin diaspor siyasəti soydaşlarımızın birlik və həmrəyliyinin möhkəmləndirilməsinə, onların daha mütəşəkkil formada təşkilatlanmasına səbəb olub. Artıq dünya azərbaycanlıları yaşadıqları ölkələrin sosial-iqtisadi, ictimai-siyasi və mədəni həyatında daha fəal rol oynayır, respublikamızla qarşılıqlı əlaqələrin genişləndirilməsinə böyük töhfə verir, Azərbaycan həqiqətlərinin dünya ictimaiyyətinə çatdırılmasında, zəngin mədəni irsimizin təbliğində, ermənilərin ideoloji təxribatlarının qarşısının alınmasında qətiyyət nümayiş etdirirlər.
Tədbir bayram konserti ilə başa çatıb.
X X X
Dünya Azərbaycanlılarının Həmrəylik Günü və Yeni il münasibətilə Sədərək rayonunda da tədbir keçirilib.
“Dünya Azərbaycanlılarının Həmrəyliyi hərəkatı” mövzusunda keçirilən tədbirdə Yeni Azərbaycan Partiyası Sədərək Rayon Təşkilatının sədri, Naxçıvan Muxtar Respublikası Ali Məclisinin deputatı Arif Qasımov çıxış edib. Bildirib ki, 31 dekabrın dünya azərbaycanlıları tərəfindən hər il ümummilli bayram kimi qeyd edilməsi azərbaycanlıların tarixi köklərə bağlılığının, milli yüksəlişinin, azadlıq mübarizəsinin qanunauyğun nəticəsidir.
Arif Qasımov vurğulayıb ki, 1991-ci il dekabrın 16-da Naxçıvan Muxtar Respublikası Ali Məclisində qəbul edilmiş tarixi qərar öz əhəmiyyətini 2001-ci il noyabrın 9-10-da Bakıda keçirilən Dünya Azərbaycanlılarının I Qurultayı ilə bir daha göstərdi. 27 il ərzində dünya azərbaycanlılarının təşkilatlanması istiqamətində görülən işlərin təhlili onu göstərir ki, bütün sahələrdə olduğu kimi, bu sahədə də Azərbaycan dövlətinin həyata keçirdiyi tədbirlər mühüm əhəmiyyət daşıyır.
“Ümummilli Liderin uzaqgörən siyasəti nəticəsində bu gün müstəqil Azərbaycan bütün dünya azərbaycanlılarının Vətəninə çevrilib. Ulu Öndərimizin şah əsəri olan güclü milli dövlətimizin olması milli həmrəyliyin və birliyin bütün dünyada yaşayan azərbaycanlıları əhatə etməsi baxımından çox vacib amildir”, - deyən Ali Məclisin deputatı qeyd edib ki, bu gün dünya azərbaycanlıları qüdrətli Azərbaycan dövləti ilə qürur duyur və iftixar hissi keçirirlər.
Tədbirdə mövzu ətrafında çıxışlar olub, Dünya Azərbaycanlılarının Həmrəylik Gününə həsr olunan film nümayiş etdirilib.
Bölmənin digər xəbərləri
