NARKOMANLIĞA VƏ NARKOTİK VASİTƏLƏRİN QANUNSUZ DÖVRİYYƏSİNƏ QARŞI MÜBARİZƏ DAVAM EDİR
Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasından AZƏRTAC-a daxil olmuş məlumatda bildirilir ki, bu ilin martında respublikamızın ərazisində narkotiklərlə bağlı 883 cinayət faktı qeydə alınmışdır. Onlardan 332-si satışla bağlıdır.
Həmin dövrdə ayrı-ayrı şəxslərdən 508 kiloqram 514 qram narkotik vasitə, psixotrop maddələr və prekursorlar, o cümlədən 31 kiloqram 687 qram marixuana, 359 kiloqram 940 qram həşiş, 94 kiloqram 713 qram tiryək, 22 kiloqram 174 qram heroin, 1200 həb tramadol, 400 həb diazepam götürülmüşdür.
Bütün bunlara görə 402 nəfər yaxalanaraq məsuliyyətə cəlb olunmuşdur. Saxlanılanların 24-ü əcnəbidir. Onların 11-i Gürcüstan, 7-si Rusiya, 5-i İran, 1-i Ukrayna vətəndaşıdır.
Hüquq mühafizə orqanları əsas diqqəti yenə də narkotik vasitələrin, psixotrop maddələrin və onların prekursorlarının qanunsuz dövriyyəsinə, qaçaqmalçılıq yolu ilə daşınmasına qarşı mübarizəyə, daxilolma mənbələrinin aşkar edilməsinə yönəltmişlər.
