Sizin Vətənimizin ayrılmaz parçası olan doğma Naxçıvana hər birsəfəriniz əsl bayrama çevrilir. Bu səfərlər ümummilli liderimizlə başlanan idarəetmə fəlsəfəsinin, quruculuq və yeniləşmə xəttinin müasir şəraitdə davamı kimi yadda qalır, sosial-iqtisadi inkişafa hər an töhfələr bəxş edir. Ölkə rəhbəri kimi muxtar respublikaya birinci səfəriniz zamanı Naxçıvan beynəlxalq hava limanı, Naxçıvan Dövlət Universitetinin elektron kitabxanasının binası, Azərbaycan Milli Elmlər Akademiyasının Naxçıvan bölməsi üçün yeni institut binası, Əlillərin bərpa mərkəzi, Yeyinti-sənaye kompleksi, Naxçıvan şəhərindəki hərbi hissənin yeni korpusu və xidmət infrastrukturları kimi mühüm sosial və müdafiə əhəmiyyətli obyektlərin açılışını etdiniz. Regional mülki müdafiə mərkəzi, Üzgüçülük mərkəzi, Heydər Əliyev adına məktəb qədim diyara ikinci səfərinizin yadigarları kimi fəaliyyət göstərir. Muxtar respublikaya üçüncü səfəriniz dahi rəhbərimizin quruculuq xəttinin daha bir ifadəsi kimi tarixə həkk olundu - muxtar respublikada kənd təsərrüfatının inkişafı üçün çox böyük əhəmiyyəti olan Heydər Əliyev Su Anbarı, Naxçıvan şəhərində Gənclik mərkəzi, Kitab evi, Şahbuz rayonunun Ayrınc kəndində orta məktəb binası, Naxçıvandakı hərbi hissədə yeni obyektlər istifadəyə verildi. Diaqnostika-Müalicə Mərkəzinin təməlqoyma mərasimi keçirildi. İqtisadi blokada vəziyyətində kəskin enerji qıtlığı şəraitində yaşayan Naxçıvan Muxtar Respublikasına Sizin himayənizlə 13 illik fasilədən sonra təbii qazın verilməsi bərpa olundu. Bu, ötən illərin ən mühüm hadisəsi idi. Ümummilli liderimiz Azərbaycana rəhbərliyinin birinci dövründə Naxçıvana əfsanə sayılan qaz kəmərinin çəkilməsini reallaşdırdısa, Siz, bu məktəbin ən layiqli yetirməsi, Heydər Əliyev yolunun ardıcıl davamçısı kimi bu məktəbin, bu yolun tükənməz yaradıcı gücünü bir daha nümayiş etdirdiniz: mürəkkəb geosiyasi şəraitə baxmayaraq, Naxçıvana yeni qaz kəməri çəkməklə qədim yurdun xilasına imza atdınız. Vətənimizin ayrılmaz parçasında Sizin rəhbərliyinizlə həyata keçirilən quruculuq tədbirləri, son 3 ildə yeni yaradılmış və fəaliyyəti bərpa olunmuş sənaye və emal müəssisələri, üzləşdiyimiz energetika problemlərinin həlli, ucaldılan məktəb binaları, səhiyyə, ali təhsil və elm müəssisələri, müharibə əlilləri, qaçqın və məcburi köçkünlər üçün tikilən yaşayış evləri, iqtisadiyyatın bütün sahələrində əldə olunan nailiyyətlər, infrastruktur sahələrində görülmüş işlər, 2003-cü ilin oktyabrından bu günə kimi açılmış 24 min 99 yeni iş yeri Sizin əhalinin rifahına yönəlmiş səmərəli dövlətçilik fəaliyyətinizin yadigarlarıdır. Bütün bunlara görə Sizə dərin minnətdarlığımızı bildiririk, muxtar respublikanın əhalisi daim Sizinlədir.

Ölkəmizdə, o cümlədən Naxçıvan Muxtar Respublikasında yeni obyektlərin istifadəyə verilməsi, yeni tikililərin ucaldılması bir daha sübut edir ki, möhtərəm Heydər Əliyevin quruculuq xətti inamla davam etdirilir. Bu siyasi xətt ulu öndərimizin sağlığında insanların rifah halının yüksəlməsinə yönəldilmişdi. Bu gün ölkə rəhbəri hörmətli İlham Əliyev də Azərbaycanda mövcud potensialın insan kapitalına çevrilməsi, başqa sözlə, əhalinin rifahının, sosial vəziyyətinin yaxşılaşdırılması üçün bütün imkanların səfərbər edilməsini bir nömrəli vəzifə kimi qarşıya qoyur. Yeni şəraitdə Azərbaycanın sosial-iqtisadi inkişaf strategiyasını ümummilli liderimiz belə müəyyənləşdirmişdir: strateji xəttimiz sərbəst iqtisadiyyat və sosial inkişaf yoludur. Hörmətli Prezidentimiz də bu xəttin davamı olaraq bildirir ki, Azərbaycanın inkişafı bundan ibarətdir: güclü iqtisadiyyat, güclü infrastruktur və güclü sosial siyasət. Ölkə Prezidentinin 2004-cü il 11 fevral tarixli Fərmanı ilə təsdiq olunmuş Azərbaycan Respublikası regionlarının sosial-iqtisadi inkişafına dair Dövlət proqramı həyatın bütün sahələrində sürətli inkişafa rəvac vermiş, regionlarda canlanma yaratmışdır. Yeni istehsal sahələrinin istifadəyə verilməsi nəticəsində əhalinin məşğulluğu xeyli dərəcədə təmin olunmuş, elektrik enerjisi, qaz, su, rabitə təminatı kimi sosial problemlərin həlli, müasir informasiya texnologiyalarının tətbiqi mədəni-intellektual səviyyəyə yol açmışdır. Göründüyü kimi, proqramın əsas qayəsi insan amilinə, vətəndaşlar üçün əlverişli mühitin yaradılmasına yönəldilmişdir. Bu sırada əsas yerlərdən birini sağlamlığın mühafizəsi, ən müasir standartlara uyğun müalicə-bərpa mərkəzlərinin yaradılması tutur. Blokada vəziyyəti ilə bağlı ölkəmizin əsas ərazisinə gediş-gəlişin çətinliyi ucbatından Naxçıvan Muxtar Respublikasında bu sahədə bir sıra problemlər mövcud idi. Hörmətli Prezidentimiz bu problemlərin həlli ilə bağlı hələ 2004-cü ildə bir sıra tapşırıqlar vermiş, Yaponiya istehsalı olan kompyuter tomoqrafiyası aparatı alınaraq, Naxçıvan respublika xəstəxanasında quraşdırılmışdır. Bununla yanaşı, problemin kompleks həlli məqsədi ilə ölkə rəhbərinin tapşırığı əsasında Naxçıvanda yeni Diaqnostika-Müalicə Mərkəzinin tikintisinə başlanıldı. Düz bir il bundan əvvəl təməlqoyma mərasimində çıxış edən hörmətli İlham Əliyev demişdir: “Qısa müddət ərzində, bir il ərzində bu diaqnostika mərkəzi tikilməlidir və burada ən yüksək səviyyədə xidmət göstəriləcəkdir. Biz xalq üçün yaşayırıq, xalq üçün işləyirik və elə etməliyik ki, xalq bütün məsələlərdə özünü rahat hiss etsin, heç bir çətinliyi olmasın”.

Cənab Prezident, Naxçıvanda Sizin daha bir yadigarınız olan yeni obyekt – Diaqnostika-Müalicə Mərkəzi hazırdır. Mərkəzin binasının istər tikinti-memarlıq həlli, istərsə də dünyada mövcud ən yeni avadanlıqların alınıb gətirilməsi və quraşdırılması daim Sizin şəxsi nəzarətiniz altında olmuş, beləliklə, tamamilə yeni bir müalicə-diaqnostika kompleksi istifadəyə verilmişdir.

Naxçıvan Diaqnostika-Müalicə Mərkəzi muxtar respublika üçün həyati vacib obyektlərdən biridir. Ümumi sahəsi 14 min kvadratmetrə yaxın olan mərkəz təcili yardım, diaqnostika, hemodializ, ümumi stasionar və kardiocərrahiyyə şöbələrindən ibarətdir. Müasir layihə əsasında inşa olunan bu səhiyyə ocağı yerləşdiyi əraziyə, muxtar respublikanın paytaxtı Naxçıvana yeni yaraşıq gətirməklə yanaşı, əhalinin məşğulluğunun təmin edilməsinə də öz töhfəsini vermişdir. Belə ki, mərkəzin tikintisində 600-700 nəfər işçi çalışmışdır. Mərkəzin istifadəyə verilməsi nəticəsində isə 350 yeni iş yeri açılacaqdır. Naxçıvan Diaqnostika-Müalicə Mərkəzi nəinki muxtar respublikada, hətta ətraf regionda bənzəri olmayan səhiyyə-sağlamlıq müəssisəsidir. Mərkəzin istifadəyə verilməsi müalicə və müayinə üçün başqa ölkələrə, Bakı şəhərinə gedib-gəlməyə məcbur olanlara muxtar respublikanın özündə tibbi müayinə və xidmət göstərilməsinə imkan yaradacaqdır. Eyni zamanda, ətraf regionların əhalisinin də burada müalicə almaq imkanı olacaqdır.

Möhtərəm Prezident, Sizin himayənizlə ucaldılan Naxçıvan Diaqnostika-Müalicə Mərkəzi 15 ildən artıq bir müddətdə blokada şəraitində yaşayan Naxçıvan Muxtar Respublikasının və əhalinin sağlamlığı, səhiyyə müəssisələrinin fəaliyyəti ilə bağlı problemlərin həllinə həssaslıqla yanaşmağınızın, göstərdiyiniz dövlət qayğısının ifadəsidir. Bu böyük qayğıya və diqqətə görə Sizə muxtar respublikanın əhalisinin, bu sağlamlıq ocağından istifadə edəcək bütün insanların minnətdarlığını çatdırıram.