Naxçıvan Muxtar Respublikasında dövlət qulluğu sahəsində aparılan islahatlar uğurla davam etdirilir
Naxçıvan, 21 aprel, AZƏRTAC
Naxçıvan Muxtar Respublikası Ali Məclisinin Sədri yanında Dövlət Qulluğu Məsələləri üzrə Komissiyanın yaradılmasının 10 illiyi qeyd olunub.
AZƏRTAC-ın Naxçıvan bürosu xəbər verir ki, tədbirdən əvvəl komissiyanın kollektivi ümummilli lider Heydər Əliyevin Naxçıvan şəhərinin mərkəzində ucaldılan abidəsi önünə gül dəstələri qoyub, Heydər Əliyev Muzeyini ziyarət ediblər.
Naxçıvan Muxtar Respublikası Ali Məclisinin Sədri yanında Dövlət Qulluğu Məsələləri üzrə Komissiyanın sədri İsmayıl Qəribli tədbir iştirakçılarını əlamətdar gün münasibətilə təbrik edərək bildirib ki, ölkəmizdə dövlət qulluğu siyasətinin əsası ümummilli liderimiz Heydər Əliyev tərəfindən qoyulub. Naxçıvan Muxtar Respublikasında da dövlət qulluğu sahəsində aparılan islahatlar uğurla davam etdirilir. Müasir tələblərə cavab verən dövlət qulluğu sistemi formalaşdırılıb, “Elektron hökumət” portalı, Vətəndaşların Müraciətləri üzrə Elektron Qeydiyyat və İdarələrarası Elektron Sənəd Dövriyyəsi sistemləri istifadəyə verilib, dövlət orqanları üçün ən müasir standartlara cavab verən yeni inzibati binalar tikilib, dövlət qulluqçularının fəaliyyəti üçün lazımi iş şəraiti yaradılıb.
“Naxçıvan Muxtar Respublikası Ali Məclisinin Sədri yanında Dövlət Qulluğu Məsələləri üzrə Komissiya Naxçıvan Muxtar Respublikası Ali Məclisi Sədrinin 2008-ci il 22 aprel tarixli Fərmanı ilə yaradılıb. Komissiyanın yaradılmasında əsas məqsəd muxtar respublikada kadr siyasətinin aparılması, dövlət qulluğu ilə bağlı qəbul edilmiş normativ-hüquqi aktların tətbiqinin təşkil edilməsi, dövlət qulluğu üçün kadrların müsabiqə yolu ilə seçilməsi və yerləşdirilməsindən ibarətdir”, - deyən İsmayıl Qəribli vurğulayıb ki, Komissiya Ali Məclis Sədrinin müəyyənləşdirdiyi tapşırıqları prinsip və istiqamət kimi öz fəaliyyətində rəhbər tutur.
İsmayıl Qəribli qeyd edib ki, ötən dövrdə Naxçıvan Muxtar Respublikası Ali Məclisinin Sədri yanında Dövlət Qulluğu Məsələləri üzrə Komissiyanın Əsasnaməsinə uyğun olaraq dövlət orqanları tərəfindən dövlət qulluğuna aid normativ aktların tələblərinə riayət olunması nəzarətdə saxlanılıb, dövlət qulluğuna dair qanunvericiliyin dövlət orqanlarında tətbiqinə nəzarət edilib.
“Komissiyanın yaradılması muxtar respublikada məşğulluq strategiyasının həyata keçirilməsinə öz müsbət töhfəsini verib. Belə ki, komissiya tərəfindən indiyədək keçirilən 14 müsabiqədə 5068 namizəd iştirak edib, onlardan 983 nəfər müsabiqələri müvəffəqiyyətlə başa vuraraq dövlət orqanlarında vakant dövlət qulluğu vəzifələrinə təyin olunub” - deyən Naxçıvan Muxtar Respublikası Ali Məclisinin Sədri yanında Dövlət Qulluğu Məsələləri üzrə Komissiyanın sədri diqqətə çatdırıb ki, hazırda muxtar respublikanın dövlət orqanlarında inzibati vəzifə tutan dövlət qulluqçularının 38,2 faizi komissiyanın keçirdiyi müsabiqələrdə uğur qazanmış dövlət qulluqçularıdır. Müsabiqələrdə iştirak edənlərin sayının ildən-ilə artması onu göstərir ki, bu sahədə həyata keçirilən dövlət siyasəti öz bəhrəsini verir və gənclərin dövlət qulluğuna marağı artır.
Bundan başqa, komissiya tərəfindən dövlət qulluğunun xüsusi növünə aid dövlət orqanlarında vakant vəzifələrin tutulması üçün elan edilmiş müsabiqələrin test imtahanları keçirilib. Müxtəlif dövlət idarələrində və nazirliklərdə vakant vəzifələrin tutulması üçün keçirilmiş 36 müsabiqədə iştirak edən 1753 namizəddən 490-ı test imtahanlarında müvafiq keçid balını toplayıb. Komissiyanın sədri dövlət qulluğu sahəsində qəbul edilmiş normativ-hüquqi aktların dövlət qulluqçuları tərəfindən öyrənilməsi və etik davranış qaydaları ilə bağlı maarifləndirici tədbirlərin diqqət mərkəzində saxlanıldığını, dövlət qulluğu haqqında qanunvericiliyin tətbiqi ilə əlaqədar digər mərkəzi və yerli icra hakimiyyəti orqanlarına metodik köməklik göstərildiyini də diqqətə çatdırıb.
Bildirilib ki, Naxçıvan Muxtar Respublikası Ali Məclisi Sədrinin tapşırığına əsasən yeni proqram təminatının yaradılması komissiyanın fəaliyyətinə müsbət təsir göstərib, elektron xidmətlərin həyata keçirilməsinə, namizədlərin internet üzərindən qeydiyyatdan keçməklə müsabiqədə iştirakına imkan yaradıb. Dövlət Qulluqçuları Reyestrinin aparılması üçün proqram təminatı hazırlanıb.
İsmayıl Qəribli çıxışının sonunda göstərilən diqqət və qayğıya görə Naxçıvan Muxtar Respublikası Ali Məclisinin Sədrinə minnətdarlığını bildirib.
Tədbirdə komissiyanın Dövlət qulluğuna kadrların seçilməsi şöbəsinin müdiri Samiq Salayev, İnformasiya texnologiyaları və proqram təminatı şöbəsinin müdiri Mahir Abbasov və Mühasibat və ümumi işlər sektorunun müdiri Türkan Gülməmmədli çıxış ediblər.
Sonda işində fərqlənən əməkdaşlara qiymətli hədiyyələr və pul mükafatları verilib.
Bölmənin digər xəbərləri
