“Neftçi” klubu ispaniyalı məşqçi ilə müqavilə imzalayıb
Bakı, 23 iyun, AZƏRTAC
"Neftçi” futbol klubu ispaniyalı fiziki hazırlıq üzrə məşqçi Fransisko Navarro ilə müqavilə imzalayıb.
Klubdan AZƏRTAC-a bildiriblər ki, 1989-1994-cü illərdə Qranada Universitetinin Bədən tərbiyəsi və idman fakültəsində təhsil almış mütəxəssis, 1995/1996-cı il mövsümündə "Rekreativo” klubunda çalışıb. 1999-2002-ci illərdə "Albasete” klubunda fəaliyyət göstərmiş 46 yaşlı məşqçi, 2005-2007-ci illərdə "Deportivo”nun uğurları üçün çalışıb. 2007-ci ildə "Atletik” Bilbao klubuna gəlmiş Fransisko Navarro 4 mövsüm ardıcıl bu klubda işləyib.
Bilbao təmsilçisinin heyətində hər zaman əsasən yerli futbolçular çıxış edib. Az sayda legionerin çıxış etdiyi "Atletik” klubunun futbolçularının əksəriyyəti klubun öz yetirmələri olub. Fiziki hazırlıq üzrə məşqçi Fransisko Navarro ilə müqavilə bağlanarkən də məhz bu amilə xüsusi diqqət yetirilib. İspaniyalı mütəxəssis yerli futbolçuların yetişdirilməsində və inkişafında böyük təcrübəyə malikdir.
Bölmənin digər xəbərləri
