NƏRGİZ ƏLİYAROVA: “...AZƏRBAYCAN BƏSTƏKARLARININ NOTLARINI İSƏ ÖZLƏRİNƏ SAXLADILAR”
Bakı Musiqi Akademiyasının dosenti, sənətşünaslıq namizədi, Azərbaycan Dövlət fortepiano triosunun solisti Nərgiz Əliyarova bu fəxri adların siyahısını bu yaxınlarda artırmış, beynəlxalq müsabiqənin laureatı olmuşdur.
İtaliyanın Coya şəhərində mayın 28-dən iyunun 1-dək keçirilən Petro Arcento adına 11-ci beynəlxalq müsabiqəyə dünyanın hər yerindən ifaçılar toplanmışdı.
Nərgiz xanım deyir: “Əvvəllər Sovet İttifaqında Avropa müsabiqələrinə düşmək çətin idi. Əvvəlcə ümumittifaq seçmə mərhələsindən keçmək lazım idi. Müttəfiq respublikaların nümayəndələrinə bu, təsadüfi hallarda müyəssər olurdu. Ancaq indi, müstəqil dövlətimizdə hər kəs beynəlxalq arenada qüvvəsini sınaya bilər, internetin inkişafı isə informasiya qıtlığına son qoymuşdur”.
Nərgiz Əliyarova Bakı Musiqi Akademiyasının dosenti Kəmalə Neymənova ilə birlikdə fortepiano duetinin tərkibində İtaliyada keçirilən beynəlxalq müsabiqənin “Kamera ansamblı” kateqoriyasında iştirak etmişdir.
Düşünürəm ki, ifaçıların necə həyəcan keçirdiyini söyləməyə ehtiyac yoxdur. Bu, onların belə mötəbər Avropa müsabiqəsində ilk çıxışı olsa da, musiqiçilərimiz 2-ci fəxri mükafata - diplom və gümüş medala layiq görülmüşlər. Azərbaycan musiqiçiləri İtaliya və Rusiya ifaçılarını çox-çox geridə qoyaraq, yalnız Yunanıstan duetini (1-ci mükafat) bir bal irəli buraxdılar. 8 nəfərdən ibarət münsiflər heyətinin tərkibində 6 italiyalı, 1 rusiyalı və 1 koreyalı var idi.
Nərgiz xanım deyir: “Avropada qalib gəlmək elə də asan deyil. Avropa dinləyicisi zərif duyum qabiliyyəti, incə zövqü, tələbkarlığı ilə fərqlənir. Mötəbər münsiflər heyətini razı salmaq da müşkül məsələdir. Virtuoz ifa və gözəl məktəblə fərqlənən italiyalıları və rusiyalıları geridə qoymağımız isə bizim üçün ikiqat xoşdur. Biz Motsartın, Şopenin, Bramsın və Arif Məlikovun əsərlərini ifa etdik. Maraqlı məqam. Müsabiqədən əvvəl ifaçılar notları münsiflər heyətinə təqdim edirdilər, baxışdan sonra isə həmin notlar ifaçılara qaytarılırdı. Arif Məlikovun “Skertso”sundan başqa bütün notları bizə qaytardılar. Sonra öyrəndik ki, Azərbaycan musiqisi onların çox xoşuna gəlib və notları özlərinə saxlayıblar...”.
Bir qədər əvvəl, mayın 18-də Nərgiz xanım Azərbaycanın Fransadakı səfirliyinin dəvəti ilə ümummilli lider Heydər Əliyevin 85 illik yubileyi münasibətilə Paris Senatının binasında keçirilən konsertdə iştirak etmişdir. Nərgiz xanım xatırlayır: “Salonda çoxlu yüksək vəzifəli fransız və müxtəlif ölkələrin diplomatik missiyalarının nümayəndələri var idi. Yaman həyəcan keçirirdik. Konsertdə mənimlə birlikdə Bakı Musiqi Akademiyasının tələbələri Cavad Tağızadə və Lalə Mürşüdlü də iştirak edirdilər. Biz Azərbaycan musiqi mədəniyyətinin korifeyləri Üzeyir Hacıbəyov, Qara Qarayev, Fikrət Əmirov, Arif Məlikov, Firəngiz Əlizadə, Aqşin Əlizadə, Vaqif Mustafazadə və başqalarının əsərlərini dünyaya tanıtdırmaqdan qürur duyurduq. Mən Avropa dinləyicisinə, əlbəttə, daha yaxın olan Şopenin noktürn və valsını da ifa etdim”.
İnstrumental musiqi konserti çox yüksək səviyyədə keçdi. Konsertdən sonra təşkil olunan rəsmi qəbulda maraqlı söhbətlər, Azərbaycan musiqisi barədə fikir mübadiləsi aparıldı. Fransız dilini bilməsi Nərgiz xanımı dinləyicilərlə daha da yaxınlaşdırdı. Konsertdə olmuş fransız pianoçusu İzabel de Ku Azərbaycan bəstəkarlarının bəyəndiyi əsərlərinin notlarını öz repertuarına daxil etmək üçün götürdü.
Qeyd etmək lazımdır ki, Nərgiz Əliyarova Bülbül adına Orta İxtisas Məktəbini qızıl medalla bitirmiş, sonra Azərbaycan Dövlət Konservatoriyasında professor Elmira Səfərovanın sinfində təhsil almışdır. Üç il dalbadal, - bu, maksimal müddətdir, - Lenin təqaüdünə layiq görülmüşdür. Konservatoriyanı bitirdikdən sonra kamera ansamblı kafedrasında, sonralar həm də xüsusi fortepiano kafedrasında müəllim işləmiş, 2001-ci ildə namizədlik dissertasiyası müdafiə etmişdir.
N.Əliyarova 2002-ci ildən Azərbaycan Dövlət fortepiano triosunun solistidir. Bu tərkibdə Almaniyada keçirilən Azərbaycan günlərində, İstanbulun ən möhtəşəm “Reşit Rey Konser Salonu”nda çıxış etmişdir.
Nərgiz xanım deyir: “Bu il mənim üçün uğurlu başlanmışdır. Nəzərdə tutduğum bir çox musiqi layihələrini həyata keçirə bilmişəm. Fevralda Fəxrəddin Kərimovun rəhbərlik etdiyi Azərbaycan Dövlət simfonik orkestri ilə birlikdə Bethovenin fortepiano ilə orkestr üçün üçüncü konsertini ifa etdim.
Nərgiz xanım yaradıcılıq planları barədə danışmağı sevmir -mümkün qədər çox çalmaq və daim öz ustalığını artırmaq onun əsas iş prinsipidir.
Ən böyük arzusu isə hələ yerinə yetməyib - Qarabağı azad görmək. Amma bu arzusuna qovuşacağına qəti əmindir.
######
Bölmənin digər xəbərləri
