NHK telekanalı: Yaponiya cəmiyyətində Konstitusiyada dəyişikliklərlə bağlı rəylər müxtəlifdir
Tokio, 3 may, AZƏRTAC
NHK telekanalı tərəfindən aparılan sorğunun nəticələrinə görə, Yaponiya Konstitusiyasında dəyişikliklərin aparılması ilə əlaqədar ölkə əhalisinin rəyi fərqlidir.
AZƏRTAC xəbər verir ki, telekanal tərəfindən həmin sorğu aprelin ortalarında aparılsa da, onun nəticələri mayın 3-də, Yaponiyada hər il qeyd edilən Konstitusiya Günündə elan olunub. Sorğu zamanı 18 yaşdan yuxarı 3480 nəfərin məsələ ilə bağlı rəyi öyrənilib. Rəyi soruşulanların yalnız 54,3 faizi anket suallarını cavablandırmağa razılıq verib.
Respondentlərdən 29 faizi Konstitusiyada dəyişikliklərin aparılmasını dəstəklədiyini, 27 faizi isə onun əleyhinə olduqlarını bildiriblər. Rəyi soruşulanların 39 faizi məsələ ilə bağlı fikir bildirməyiblər.
Dəyişiklikləri dəstəkləyənlərin 54 faizinin rəyinə görə, Konstitusiya artıq köhnəlib. Həmin şəxslərin 32 faizi ölkənin müdafiə hüquqlarının təsbit edilməsinin və Özünümüdafiə Qüvvələrinin mövcudluğunun zəruriliyini bildiriblər. Onlardan 5 faizinin rəyinə görə, hazırda mövcud olan Konstitusiya Yaponiyaya ABŞ tərəfindən qəbul etdirilib, 4 faizi isə hesab edir ki, əsas qanunda şəxsi həyatın toxunulmazlığının təminatının və yeni insan hüquqlarının öz əksini tapmasına ehtiyac var.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
