SİYASƏT
Nicat İsmayılov: Azərbaycan-Tacikistan əlaqələri tarixi köklərə söykənir
![Nicat İsmayılov: Azərbaycan-Tacikistan əlaqələri tarixi köklərə söykənir](/files/2023/1/1200x630/16808585341437245294_1200x630.jpg)
Bakı, 7 aprel, AZƏRTAC
Ötən əsrin 90-cı illəri dünyanın siyasi xəritəsində baş vermiş mühüm hadisələrlə yadda qalıb. Postsovet məkanında bir-birinin ardınca yeni-yeni müstəqil dövlətlər meydana çıxdı. 1991-ci il sentyabrın 9-da Tacikistanın dövlət müstəqilliyini əldə etməsi ilə onun inkişafı yolunda yeni üfüqlər açıldı. Tacik xalqı belə bir fürsəti məqamında dəyərləndirdi, sosial-iqtisadi və siyasi sahədə bir sıra mühüm qərarlar qəbul etdi.
Bunu AZƏRTAC-a açıqlamasında siyasi şərhçi Nicat İsmayılov söyləyib.
O qeyd edib ki, Tacikistanda hazırda ictimai-siyasi sabitlik mövcuddur. Bu, davamlı inkişaf üçün əsas amildir. Ötən illər ərzində bu ölkə dayanıqlı, sabit inkişafa nail olmuş mühüm sosial məsələlərin həllinə yönələn vacib qlobal təşəbbüslərlə çıxış etmişdir. Beləliklə, ölkədə həyatın tələblərinə cavab verə biləcək müasir sənaye sahələri də yaradılıb. Bütün bunlar ölkənin iqtisadiyyatının dirçəldilməsinə müsbət təsir göstərib və tacik xalqı həyatın müxtəlif sahələrində yeni-yeni uğurlara imza atıb. Dövlət sektoruna daxil olan yeni infrastruktur bölmələri yaradılıb. Bu addım müstəqilliyin kövrək illərini yaşayan bir ölkə üçün xarakterik idi. Azərbaycan kimi, qardaş Tacikistanda da əlverişli iqlim şəraiti ölkədə kənd təsərrüfatı və sənaye məhsullarının istehsalını artırmağa imkan verdi. Zəngin hidroenerji potensialına malik olan bu ölkə dünyada adıçəkilən sahə üzrə səkkizinci yerdə durur.
Təqdirəlayiq haldır ki, Tacikistan XXI əsrin əvvəllərindən başlayaraq qlobal forumlarda ayrı-ayrı dövlətlərin və beynəlxalq ictimaiyyətin diqqətini içməli su problemlərinin həllinə yönəldir. Təsadüfi deyil ki, Tacikistanın və bir sıra digər ölkələrin təşəbbüsü ilə BMT Baş Məclisi 2003-cü ili “Beynəlxalq içməli su İli”, 2005-2015-ci illəri “Su həyat üçündür!” Beynəlxalq fəaliyyət onilliyi və 2013-cü ili “Beynəlxalq su əməkdaşlığı İli” elan etmişdi. Bütün bunlar bəşəriyyətin xoşbəxt gələcəyi naminə atılan mühüm addımlar olub.
Siyasi şərhçinin sözlərinə görə, tarixən hər iki xalqı İpək yolu birləşdirsə də, dini etiqad ümumiliyi, hər ikisinin Şərq mədəniyyətinin mərkəzində yer tutmaları, zəhmətkeş, qonaqpərvər, sülhsevər keyfiyyətlərə malik olmaları, eyni dinə qulluq etmələri taciklərin azərbaycanlılarla həmrəyliyini şərtləndirən mühüm amillər olub. İki ölkə arasında diplomatik münasibətlər 1992-ci il mayın 29-da qurulub. Tacikistanın Cənubi Qafqazda ilk diplomatik nümayəndəliyi də məhz Bakıda açılıb. 2007-ci ildə Azərbaycanın Tacikistanda, bir il sonra isə Tacikistanın Azərbaycanda səfirliyi fəaliyyətə başlayıb. Diqqətəlayiq haldır ki, 1996-1999-cu illərdə “BMT ilə ATƏT arasında əməkdaşlıq haqqında” qətnamə layihəsində Azərbaycanın Dağlıq Qarabağ regionunun Azərbaycan Respublikasına mənsubluğunu təsdiqləyən, mühüm əhəmiyyət kəsb edən düzəliş Tacikistan tərəfindən də dəstəklənib. Hər iki dövlətin rəhbərləri arasında yüksəksəviyyəli görüşlərin keçirilməsi normal siyasi münasibətlərin qurulması üçün möhkəm zəmin yaradıb. Azərbaycan Respublikasının Prezidenti İlham Əliyevin Tacikistana səfərləri qarşılıqlı münasibətlərdə mühüm addım olub. Həmçinin Tacikistan Respublikasının Prezidenti Emoməli Rəhmonun Azərbaycana səfərləri hər iki ölkənin gələcək inkişaf perspektivlərini müəyyənləşdirib.
“Bu il aprelin 5-də Azərbaycan Prezidenti İlham Əliyevin Tacikistana dövlət səfəri gerçəkləşib. Tacikistan Prezidenti Emoməli Rəhmonun dəvəti əsasında həyata keçirilən səfər iki ölkə arasında diplomatik münasibətlərin qurulmasının 31-ci ildönümünə təsadüf edib. Azərbaycan Prezidenti ilə görüşündə Tacikistanın dövlət başçısı müxtəlif sahələrdə daim genişlənən qarşılıqlı faydalı əməkdaşlığın xalqlarımızın mənafeyinə uyğun olduğunu vurğulayıb. Prezident İlham Əliyevin bu səfəri əvvəlkilərdən fərqli olaraq, iki ölkə arasında strateji əməkdaşlıq baxımından xeyli sayda sənədlərin imzalanması ilə yadda qaldı. Azərbaycan Prezidentinin budəfəki səfərinin də məqsədi ölkələrimiz arasında yüksək səviyyədə olan əlaqələrin daha da inkişafına və qarşılıqlı maraq doğuran sahələrdə əməkdaşlığın gücləndirilməsinə töhfə verməkdir. İkitərəfli münasibətlərin gündəliyində olan aktual məsələlərin müzakirəsi məqsədilə Azərbaycanın dövlət başçısı İlham Əliyev Tacikistan Prezidenti Emoməli Rəhmon ilə təkbətək və geniş tərkibdə görüşlər keçirdi. Bu səfər Azərbaycan Respublikası Prezidentinin Tacikistana beşinci səfəridir. Azərbaycan Prezidenti son olaraq 2018-ci il sentyabrın 27-28-də Düşənbədə keçirilmiş MDB Dövlət Başçıları Şurasının toplantısında iştirak edib. Parlamentlərarası əlaqələrə gəldikdə deyə bilərik ki, Azərbaycan Respublikası Milli Məclisində Azərbaycan-Tacikistan parlamentlərarası əlaqələr üzrə işçi qrupu fəaliyyət göstərir”, - deyən Nicat İsmayılov vurğulayıb ki, dövlətimizin başçısının budəfəki səfəri zamanı iki ölkə prezidenti siyasi-iqtisadi əlaqələrin inkişafı üçün yeni razılaşmalar əldə ediblər.