ÖTƏN İL AĞSUDA SOSİAL-İQTİSADİ SAHƏDƏ DİQQƏTƏLAYİQ NAİLİYYƏTLƏR QAZANILIB
AZƏRTAC xəbər verir ki, fevralın 8-də Ağsu şəhər mədəniyyət sarayında rayon icra hakimiyyətinin hesabat yığıncağı keçirilmişdir. Ərazi icra nümayəndələrinin, bələdiyyə sədrlərinin, hüquq mühafizə orqanları və digər dövlət təşkilatları rəhbərlərinin, sahibkarların, ictimaiyyət nümayəndələrinin qatıldığı iclasın iştirakçıları əvvəlcə şəhərin mərkəzi meydanında ümummilli lider Heydər Əliyevin büstü önünə əklil və gül-çiçək dəstəsi qoymuş, ulu öndərin xatirəsini ehtiramla anmışlar.
Sonra iştirakçılar mədəniyyət sarayının foyesində yerli kənd təsərrüfatı və sənaye məhsullarının sərgisi ilə tanış olmuşlar.
Ağsu rayon icra hakimiyyətinin başçısı Əflatun Rufiyev “2006-cı ildə rayonda görülmüş işlərin yekunları və qarşıda duran vəzifələr” mövzusunda hesabat məruzəsi ilə çıxış etmişdir. Prezident İlham Əliyevin rəhbərliyi ilə ölkəmizin sosial-iqtisadi həyatının bütün sahələrində ötən il qazanılan uğurları konkret faktlarla xatırladan məruzəçi, regionların sosial-iqtisadi inkişafı Dövlət proqramından irəli gələn vəzifələrin Ağsu rayonunda da müvəffəqiyyətlə həyata keçirildiyini bildirmişdir.
Ötən il iyunun 30-da Prezident İlham Əliyevin Ucar və Zərdab rayonlarından qayıdarkən yolüstü Ağsuya gəlişini və sakinlər qarşısında çıxışını iftixar hissi ilə xatırladan icra başçısı demişdir ki, Dövlət proqramının qəbulundan sonra iqtisadiyyatın ayrı-ayrı sahələrində əsaslı irəliləyişlər olmuş, istehsal və məhsuldarlıq göstəriciləri xeyli yüksəlmişdir. Keçən il rayonda 1580 ton pambıq, rekord miqdarda - 74,4 min ton taxıl istehsal olunmuşdur. Quşçuluq, yerli şərabçılıq və konserv sənayesi yeni inkişaf dövrünə qədəm qoymuşdur.
Hesabat ilində rayonda 751 nəfər işlə təmin olunmuşdur ki, onların da 286-sı yeni işə salınan və fəaliyyəti bərpa olunan müəssisələrdə çalışır. Son 3 ildə isə rayonda 1789-u daimi olmaqla 4673 iş yeri yaradılmışdır.
Keçən il sahibkarlığın inkişafına xüsusi diqqət yetirilmiş, məhsul istehsalında qeyri-dövlət sektorunun xüsusi çəkisi artmışdır. Aqrar sahədə məhsullar bütünlüklə özəl bölmədə istehsal olunur. Nəqliyyat sahəsi tamamilə özəl əsaslara keçirilmişdir. Sənaye məhsulu istehsalında qeyri-dövlət sektorunun payı 799,5 manat təşkil edir ki, bu da ümumi istehsalın 64,3 faizi qədərdir. Tikinti işlərinin həcmi 23,3 faiz artmışdır. İl ərzində ümumi sahəsi 2754 kvadratmetr olan 26 fərdi mənzil tikilmişdir.
2006-cı ildə rayonda pərakəndə əmtəə dövriyyəsinin həcmi 42 milyon manat təşkil etmişdir ki, bu da əvvəlki ildəkindən 59,2 faiz çoxdur. Pərakəndə əmtəə dövriyyəsində özəl sektorun payı 99,9 faiz olmuşdur. Təhsil, səhiyyə, mədəniyyət və sosial sahələrdə də mühüm işlər görülmüşdür. Dövlət proqramına uyğun olaraq rayonun ən iri yaşayış məntəqələrindən olan Gəğəli kəndində 480 şagird yerlik orta məktəb binası tikilib istifadəyə verilmişdir. Heydər Əliyev Fondunun “Yeniləşən Azərbaycana yeni məktəb” proqramı çərçivəsində Növcü kəndində 380, Ərəbmehdibəy və Padar kəndlərində isə 240 şagird yeri olan məktəb binaları istifadəyə verilmişdir. Ağsu yardımçı stansiyasında 7,5 meqavat gücündə transformator 16 meqavatlıqla əvəz edilmiş, 17 transformator əsaslı təmir olunmuş, 3 yeni transformator quraşdırılmışdır. 6455 abonentin mənzili sayğaclaşdırılmışdır. “Birləşmiş Su-Kanalı” MMC-nin vəsaiti hesabına 1470 metr uzunluğunda yeni su kəməri çəkilərək Ağsunun Melioratorlar yaşayış sahəsində və şəhərin 4 küçəsində 450 abonent içməli su ilə təmin olunmuşdur.
Yığıncaqda qarşıda duran təxirəsalınmaz vəzifələrdən də geniş danışılmışdır. Göstərilmişdir ki, regionların sosial-iqtisadi inkişafı Dövlət proqramına uyğun olaraq rayonun yerli resursları və digər mənbələri nəzərə alınaraq 2007-2008-ci illər üçün sosial-iqtisadi inkişaf proqramı hazırlanmışdır. Proqramda qarşıdakı 2 il ərzində yerli sənaye müəssisələrinin fəaliyyətinin bərpası, əhalinin fasiləsiz olaraq elektrik enerjisi və təbii qazla təmin edilməsi sahələrində görüləcək işlər, 5 min yerlik stadionun, idman sağlamlıq kompleksinin tikintisi və digər bir sıra sosial məsələlər öz əksini tapmışdır. 2007-ci ildə aqrar sahədə islahatların ikinci mərhələsini sürətləndirmək və məhsul istehsalı həcmini 19 milyon manata çatdırmaq, səhiyyə, tikinti və rabitə müəssisələrinin fəaliyyətini müasir tələblər səviyyəsində qurmaq üçün geniş tədbirlər həyata keçiriləcəkdir. Yol tikintisi və təmiri, suvarma suyu ilə təminatın yaxşılaşdırılması məqsədi ilə 1625 min manatlıq işlərin görülməsinə başlanacaqdır. Bütün bunlar da yüzlərlə yeni iş yerinin açılmasına imkan verəcəkdir.
Dövlət Torpaq və Xəritəçəkmə Komitəsinin sədri Qərib Məmmədov və Milli Məclisin deputatı Ərəstun Cavadov yığıncaqda çıxış etmişlər.
Hesabat yığıncağında Prezidentin İcra Aparatının məsul işçisi Habil Əzənmədov iştirak etmişdir.
Sonda Azərbaycan Prezidenti İlham Əliyevə müraciət qəbul olunmuşdur.
Bölmənin digər xəbərləri
