Paris, 16 avqust (AZƏRTAC). Parisdə erməni lobbisinin vəsaiti hesabına nəşr olunan gündəlik “Ermənistan xəbərləri“ jurnalı 15 avqust tarixli nömrəsində müstəqil erməni jurnalisti Vaqe Harutyunyanın “Ermənistanda işçi qüvvəsi sürətlə azalır“ sərlövhəli məqaləsini dərc etmişdir.

Məqalədə bildirilir ki, ermənilərin ölkəni kütləvi şəkildə tərk etdikləri bir vaxtda Ermənistan rəhbərliyi iqtisadiyyatın inkişafı, əhalinin sosial vəziyyətinin yaxşılaşdığı, yoxsulluğun aradan qaldırıldığı barədə həqiqətə uyğun olmayan pafoslu çıxışları ilə dünya ictimaiyyətində “cənnət-məkan Ermənistan“ obrazı yaratmağa cəhd göstərir. Amma ölkədə hökm sürən ağır ictimai-siyasi vəziyyət Ermənistanın iqtisadi durumu barədə real təsəvvür yaradır. Bunu hətta erməni jurnalistləri belə etiraf etməyə məcbur olurlar. Çünki yaxşı başa düşürlər ki, artıq cidanı çuvalda gizlətmək qeyri-mümkündür.

Ölkəsində miqrasiyanın kütləvi hal alması ilə bağlı həyəcan təbili çalan müəllif qeyd edir ki, Ermənistanı yalnız sadə insanların deyil, gələcəyə ümidini itirən yüksək ixtisaslı mütəxəssislərin tərk etmələri ciddi narahatlıq doğurur.

Məqalədə göstərilir ki, bu ilin yanvar və fevral aylarında 22 mindən artıq erməni doğma vətənlərini tərk etmişdir. Xaricə üz tutanların əksəriyyəti Rusiyada məskunlaşmışdır. Əsasən mövsümi işlərdə çalışan ermənilərin qış aylarında yalnız bir qismi geri qayıdır. Belələri barmaqla sayılacaq qədər azdır. Ermənistanı tərk edənlərin çoxu isə Rusiyada həmişəlik qalmağa və bu ölkənin vətəndaşlığını almağa can atır. Ermənistan rəhbərliyi vətəndaşların ölkəni mövsümü işlərlə əlaqədar tərk etdiklərini desə də, bu, öz təsdiqini tapmır.

Müəllif sosial-demoqrafiya üzrə ermənilərin təşəbbüs qurumunun rəhbəri Ruben Yeqanyana istinadla bildirir ki, dövlət miqrasiya xidmətinin illik məlumatına nəzər yetirilsə, hər il on minlərlə erməninin geri qayıtmadığını görmək olar. Miqrasiya xidməti son beş ildə 180 mindən artıq erməninin ölkəni tərk etdiyini açıqlamışdır. Əhalisi üç milyondan az olan bir ölkə üçün bu, böyük itkidir. Siyasi, sosial-iqtisadi və hər hansı digər səbəbdən asılı olmayaraq bu, Ermənistanın işçi ehtiyatının böyük itkisi deməkdir. Əslində, rəsmi məlumatlar reallığı heç də tam əks etdirmir. Qeyri-rəsmi məlumata görə, ölkəni tərk edənlərin sayı bundan qat-qat çoxdur.

Məqalədə demoqrafiya problemləri ilə məşğul olan erməni eksperti Qagik Makaryannın açıqlamaları da yer almışdır. O bildirir ki, Ermənistanda miqrasiyaya əhalinin yoxsul təbəqəsi arasında daha çox rast gəlinir. Bunun əsas səbəbi ailəni dolandırmaqla bağlıdır. İqtisadiyyatı iflic vəziyyətinə düşən, işsizliyin hökm sürdüyü, korrupsiyanın baş alıb getdiyi, əhalisinin əksəriyyətinin yoxsulluğun son həddində yaşadığı bir ölkədə ailə dolandırmaq müşkül məsələdir. Elə buna görə də Ermənistanı tərk edənlərin sayı ildən-ilə artır. Dövlət rəsmiləri isə miqrasiyanın qarşısını almaqda maraqlı deyillər.

İqtisadçı mütəxəssis Armenak Katinyan da həyəcan təbili çalaraq ölkə iqtisadiyyatının getdikcə daha bərbad vəziyyətə düşdüyünü bəyan edir. Bu isə miqrasiya hallarının artmasına gətirib çıxaran əsas amildir. Ermənistan Statistika Agentliyi rəsmən bildirmişdir ki, ölkə əhalisinin üçdəbiri yoxsulluğun son həddində yaşayır. İşsizliyin səviyyəsi 2012-ci ilin sonunda 16 faizdən artıq olmuşdur. Əslində isə daim artmaqda olan işsizlərin sayı bundan qat-qat çoxdur.

Məqalədə ailəsini dolandırmaq naminə Rusiyaya üz tutan 45 yaşlı Norik Qriqoryanın söylədikləri də oxucuların diqqətinə çatdırılır. O bildirir ki, kəndlilər acınacaqlı halda yaşayırlar, kəndlər getdikcə boşalır. Hökumət isə kənd təsərrüfatını inkişaf etdirmək üçün heç bir iş görmür.

Bugünkü Ermənistan reallığının əsas mahiyyəti bundan ibarətdir.

Əsgər Əliyev

AZƏRTAC-ın xüsusi müxbiri

Paris