Prezident seçkiləri günü Mətbuat Şurasında “qaynar xətt” fəaliyyət göstərəcək
Bakı, 10 aprel, AZƏRTAC
Azərbaycan Mətbuat Şurası aprelin 11-də keçiriləcək prezident seçkilərində jurnalistlərin prosesi işıqlandırmalarının monitorinqini aparacaq. Bu məqsədlə Şuranın İdarə Heyətinin üzvləri paytaxtda və ölkəmizin müxtəlif bölgələrindəki seçki məntəqələrində peşə vəzifəsini yerinə yetirən jurnalistlərə yaradılmış şəraitlə tanış olacaqlar. Bu barədə AZƏRTAC-a Şuradan məlumat verilib.
Mətbuat Şurasına üzv olan mərkəzi və regional kütləvi informasiya vasitələrinin əməkdaşları da bu işə cəlb olunublar. Monitorinqin 125 seçki dairəsinin mütləq əksəriyyətini əhatə etməsi nəzərdə tutulub. Şuranın İdarə Heyətinin üzvləri, həmçinin müşahidəçi qismində də seçkinin gedişini izləyəcəklər.
Bundan başqa, Mətbuat Şurasının (012) 441-35-30, (055) 201-99-26 və (050) 242-09-91 nömrələri aprelin 11-də “qaynar xətt” rejimində fəaliyyət göstərəcək. Peşə fəaliyyətini yerinə yetirən jurnalistlər hər hansı çətinliklə üzləşəcəkləri halda həmin nömrələrə zəng etməklə məlumat verə biləcəklər.
Mətbuat Şurası səsvermə günü Mərkəzi Seçki Komissiyası və digər müvafiq qurumlarla sıx əməkdaşlıq şəraitində fəaliyyət göstərəcək. Şura jurnalistlər üçün hər hansı maneə yaranacağı təqdirdə çətinliyin dərhal aradan qaldırılması istiqamətində zəruri tədbirləri reallaşdıracaq.
Bölmənin digər xəbərləri
