QAÇQIN VƏ MƏCBURİ KOÇKÜNLƏR ÜMUMXALQ SƏSVERMƏSİNDƏ FƏALLIQLA İŞTİRAK ETMİŞLƏR
Avqustun 24-də minlərlə bərdəli və rayonun ərazisində müvəqqəti məskunlaşmış qaçqın və məcburi köçkünlər Azərbaycan Respublikası Konstitusiyasına dəyişikliklər edilməsi məqsədi ilə keçirilən referendumda fəallıqla iştirak etmişlər.
Türkiyənin beynəlxalq “Qızıl ay” təşkilatının Bərdədəki çadır şəhərciyində 4 və 5 saylı referendum məntəqələrində 2 min 907 nəfər seçicinin əksəriyyəti öz vətəndaşlıq borcunu yerinə yetirmişdir. Məcburi köçkünlər İldırım Məmmədov, Cəsarət Xudiyev, Xuraman Məmmədova birinci olaraq, məntəqəyə gələrək səs vermiş, ölkəmizin həyatında mühüm mərhələ olan referendumun uğurla başa çatacağına əmin olduqlarını bildirmişlər.
47 saylı Ağdam referendum dairəsinin 2 saylı referendum məntəqəsinin sədri Aftandil Məmmədov AZƏRTAC-ın müxbirinə bildirmişdir ki, ümumxalq səsverməsində iştirak edən 1480 nəfər seçicinin əksəriyyəti günortaya qədər səs vermişdir.
47 və 48 saylı Ağdam referendum dairələrinin bütün məntəqələrində ümumxalq səsverməsi mütəşəkilliklə keçmişdir. Beynəlxalq təşkilatların, siyasi partiyaların, ictimai birliklərin nümayəndələri referendumun gedişini diqqətlə izləmiş və səsvermənin gedişindən razı qaldıqlarını bildirmişlər.
X X X
Azərbaycan Respublikası Konstitusiyasına dəyişikliklər edilməsi ilə bağlı keçirilən referendum Bərdə, Tərtər, Yevlax, Ağcabədi və Beyləqan rayonlarında da tam demokratik qaydada, seçicilərin fəallığı şəraitində başa çatmışdır.
Bölmənin digər xəbərləri
