İDMAN
Qadın boksçularımız dünya çempionatında səkkizdəbir finala vəsiqə qazanıb
Bakı, 18 noyabr, AZƏRTAC
Koreya Respublikasının Jeju şəhərində boks üzrə qadınlar arasında dünya çempionatı davam edir.
Azərbaycan Boks Federasiyasından AZƏRTAC-a bildiriblər ki, noyabrın 18-də rinqə çıxan üç boksçumuzdan ikisi qələbə qazanıb. Anna Əlimərdanova (54 kq) Meksika təmsilçisi Sosa Paredes Denia Karinanı məğlub edib. Milli komandamızın üzvü səkkizdəbir finalda irlandiyalı Mikaela Volş ilə üz-üzə gələcək.
Yana Alekseyeva (60 kq) dünya çempionatında ikinci görüşünü də qələbə ilə başa vurub. Boksçumuz bu dəfə Almaniya nümayəndəsi Taşenaa Buqarı mübarizədən kənarlaşdırıb. Y.Alekseyeva səkkizdəbir finalda Ukrayna idmançısı Yuliya Tsiplakova ilə qarşılaşacaq.
Əzizə Abbasova (48 kq) isə ilk görüşdə rusiyalı Zoya İsayevaya uduzaraq dünya çempionatında mübarizəni dayandırıb.
A.Əlimərdanova və A.Alekseyevadan əvvəl Yelena Vıstropova da səkkizdəbir finala vəsiqə əldə etmişdi.
Dünya çempionatına noyabrın 24-də yekun vurulacaq.